Trump miratoi vrasjen e Soleimanit shtatë muaj më parë – priste vetëm që Irani të kalonte vijën e kuqe

Presidenti amerikan, Donald Trump, kishte autorizuar vrasjen e gjeneralit të lartë iranian, Qassem Soleimani verën e kaluar – nëse ndonjë amerikan do të vritej si rezultat i agresionit të shtuar iranian – ka shkruar NBC të hënën, duke përmendur pesë zyrtarë aktualë dhe ish-zyrtarë të lartë të administratës.

Sipas mediumit në fjalë, përcjell Telegrafi, zyrtarët kanë thënë se këshilltari i atëhershëm i sigurimit kombëtar John Bolton i kërkoi presidentit Trump të hakmerrej për Iranin, pas rrëzimit të një droni amerikan në qershor duke aprovuar një operacion për të vrarë Soleimanin.

Zyrtarët thanë gjithashtu se Sekretari i Shtetit, Mike Pompeo, mbështeti vendimin për të vrarë Soleimanin në atë kohë.

Megjithatë, Trump kishte thënë se ai do të merrte masa vetëm nëse Irani do të vriste ndonjë amerikan, një person i informuar për diskutimin i tha NBC.

Raporti sjell në pikëpyetje arsyetimin e administratës Trump për vrasjen e Soleimanit në një sulm me dron në fillim të këtij muaji pas një sulmi në të cilin vdiq një kontraktues amerikan.

Zyrtarët e administratës kanë pohuar se vrasja e komandantit të lartë iranian ishte e nevojshme për shkak të një kërcënimi të afërt të sulmeve që Soleimani po komplotonte.

Megjithatë, kritikët e vendimit kanë vënë në dyshim se sa “të nevojshme menjëherë” ishin sulmet.

Demokratët e dënuan gjerësisht sulmin dhe shumë anëtarë të Kongresit pohuan se inteligjenca nuk e mbështeti vendimin, bazuar në informacionin për të cilin u informuan.

“Ka pasur një sërë opsionesh që i janë paraqitur presidentit me kalimin e kohës”, citohet të ketë thënë një zyrtar i lartë i administratës për NBC.

Po sipas të njëjtit medium, ideja e vrasjes së Soleimanit doli në vitin 2017 gjatë bisedave në të cilat këshilltari i atëhershëm i sigurimit kombëtar H. R. McMaster kishte me zyrtarë të administratës për strategjinë më të gjerë të sigurisë kombëtare të presidentit Trump.

Ideja raportohej se ishte një nga elementët e mundshëm të një fushate “presioni maksimal” kundër Iranit dhe “nuk ishte diçka që mendohej si veprim i parë” tha një ish zyrtar i administratës së lartë i përfshirë në diskutime.

Dhe ky opsion u bë më serioz nën Bolton, i cili zëvendësoi McMaster në prill të vitit 2018.

Mediumi tjetër The Hill shkruan se Shtëpinë e Bardhë nuk u përgjigj menjëherë për komente kur u kontaktua mediumi në fjalë. /Telegrafi/