Klopp ironizon me Mourinhon në pyetjen se cili ka qenë më i mirë si futbollistë: Nuk e di çfarë pozite ka luajtur, ndoshta ka qenë portier

Tottenham Hotspur do të jetë nikoqir i Liverpoolit në ndeshjen kryesore të javës së 22-të në Ligën Premier.

Kjo ndeshje do të vë përballë dy trajnerë fantastikë, Jose Mourinhon e vendasve dhe Jurgen Kloppin e mysafirëve.

Trajneri gjerman i Liverpoolit ka dhuruar spektakël në konferencën për shtyp me gazetarë në lidhje me homologun e tij portugez.

Gazetarët anglezë e pyetën gjermanin nëse ka qenë ai më i mirë gjatë karrierës si futbollist apo Jose Mourinho.

Klopp ka ironizuar duke thënë se nuk e di se çfarë pozite ka luajtur portugezi dhe mendonte se ishte portier, ndërsa u kërkoi gazetarëve të kërkonin në ‘Google’, për pozicionin që kishte Mourinho.

“Nuk e di se në çfarë pozite ka luajtur Mourinho… A ishte portier? A e di dikush se në çfarë pozite ka luajtur Mourinho?”.

“Mos më fajësoni mua nëse nuk e dini… Mendoj se ka qenë portier… Unë dua ta di tani pozitën që ka pas. Shikojeni në Google”, iu drejtua Klopp gazetarëve duke qeshur.

Gazetari anglez iu përgjigj që nuk kanë kohë, ndërsa Klopp ia ktheu menjëherë: “Kemi kohë, unë kam kohë”.

Pasi gazetari e shikoi në Google, ai iu përgjigj se Mourinho ka luajtur mesfushor.

E në atë moment Klopp i kërkoi falje Mourinhos duke qeshur: “Më fal Jose”, përfundoi Klopp.

Mbetet të shihet në përballjen mes dy skuadrave që fillon nga ora 18:30 se cili do të fitojë sfidën. /Telegrafi/

Jurgen Klopp made someone google which position Jose Mourinho used to play in 😂 pic.twitter.com/LP5KcI8sJF

— ESPN FC (@ESPNFC) January 10, 2020