Selmanaj: Vettingu do të hetojë edhe “milionin e parë” të zyrtarëve publikë

Kandidati për deputet nga LDK-ja, Driton Selmanaj ka thënë se me anë të vettingut duhet të hetohet pasuria që nga fillimi i zyrtarëve publik e jo të kalohen disa vite.

Selmanaj, në “Debat Plus” me Ermal Pandurin në RTV Dukagjini ka thënë se korrupsioni është problemi themelor që përballet Kosova.

Ai thotë se ky fakt është i përmendur jo vetëm nga organizatat vendore, por edhe nga ndërkombëtarët.

Kandidati për deputet nga LDK-ja ka thënë se edhe eksponentët e partive politike që kanë qenë në pushtet po e përmendin që shteti është i kapur.

“Kujtojmë një deklaratë të zotit Sami Lushtaku, ku në një intervistë ka thënë se shteti është i kapur nga katër–pesë persona, madje duke aluduar në persona të PDK-së”.

Selmanaj ka thënë se për LDK-në hapi i parë në luftën kundër korrupsionit është dekriminalizimi i drejtësisë, policisë e AKI-së.

“Faza e dytë është vettingu. Ne jemi në faza të konsultimit cili është modeli më i mirë pra ai i Shqipërisë, Maqedonisë apo vendeve tjera që kanë kaluar këtë proces”.

Kandidati për deputet nga LDK-ja ka thënë se duhet të bëhet hetimi i pasurisë së zyrtarëve të lartë publikë në Kosovë.

Ai ka thënë se nuk ka kuptim që të mos hetohet prejardhja e pasurisë.

“Ligjet e kaluara nuk kanë pasur efekt prapaveprues. Të kthehemi tek ajo pyetja ‘mos më pyet si e bëra milionin e parë, se të tjerët t’i tregoj vet’. Ne duam të kthehemi qysh në fillim që të provojmë të dekriminalizojmë edhe skenën politike”, tha Selmanaj./Telegrafi/