Sarri ndodhet në Itali, vendoset në hotelin që frekuentohet nga Paratici

Trajneri i Chelseat, Maurizo Sarri, është tashmë në Itali dhe është parë duke hyrë në një hotel në Milano që Juventusi e përdor shpesh për negociata.

Sky Sports Italia dhe Sportitalia, raportojnë se mbrëmjen e kaluar skuadra londineze është pajuar që ta lirojë nga kontrata trajnerin italian, disa ditë pasi fituan Ligën e Evropës.

Sarri ka kërkuar nga Chelsea që të largohet, pasi dëshiron të kthehet në Itali për arsye profesionale dhe personale, gjersa është ndier edhe i fyer nga tifozët dhe mediat.

Përderisa Milani dhe Roma janë të interesuara për trajnerin italian, ky i fundit dëshiron të transferohet te Juventusi, pasi ka filluar bisedimet tashmë.

Lexo po ashtu Të gjitha lajmet nga Maurizio Sarri

Këtë mbrëmje (1 qershor), La Repubblica ka postuar një video ku shihet Sarri duke u futur në hotelin Palazzo Parigi në Milano, një lokacion që frekuentohet shpesh nga drejtori i Zonjës së Vjetër, Fabio Paraciti.

Paratici besohet se kishte qenë në Capri natën e kaluar,  por raportohet se menjëherë është nisur për në Milano, ku pritet të takohet me trajnerin e Chelseat. /Telegrafi/