Ermal Krasniqi, talenti që shpërtheu në pranverë te Ferizaj: I lumtur me golat dhe formën e mirë, ëndërroj ftesë nga Kosova U-21

Ferizaji është njëra nga skuadrat më në formë në elitën e futbollit kosovar, me pesë fitore në pesë takimet e fundit.

E njëri nga futbollistët më meritor për këtë sukses të Ferizajt, është supertalenti nga Malisheva, Ermal Krasniqi.

Në një intervistë për Telegrafin, Krasniqi flet për formën e lartë që po kalon, golat e shënuar si dhe besimin e madh që i dha trajneri Bylbyl Sokoli.

Sulmuesi këmbëshpejtë thotë se ka ëndërr ta përfaqësojë Kosovën dhe pret një ftesë nga Përfaqësuesja U-21.

“Ishin pesë fitore të mëdha në pesë ndeshje radhazi dhe jam shumë i lumtur që isha pjesë e këtyre fitoreve”, u shpreh Krasniqi për Telegrafin.

20-vjeçari iu bashkua Ferizajt nga Llapi pas insistimit të trajnerit Bylbyl Sokoli.

“Dua ta falënderojë profen Bylbyl Sokoli i cili besoi në mua që nga fillimi dhe tani po e shpaguajë atë besim”.

“Në fillim të sezonit pranveror kam punuar shumë që të rikthehem në formë pas lëndimit. Kam punuar me zizioterapeutët e klubit, në veçanti Endrit Lutës i cili më ndihmoi shumë në fazën rikuperuese”, tha Krasniqi.

Talenti nga Malisheva, gjatë këtij edicioni ka arritur të shënoj pesë gola dhe të bëjë tre asistime.

“Jam shumë i lumtur që kam kontribuar për klubin me pesë gola e tre asistime. Shpresojë që të vazhdoj me këtë formë edhe në dy ndeshjet e fundit”, deklaroi sulmuesi anësorë.

20-vjeçari tani pret që të marrë edhe ftesë nga Përfaqësuesja e Kosovës U-21, pasi për të kjo do të ishte një ëndërr e bërë realitet.

“Si çdo futbollist që ëndërron të luaj për shtetin e tij edhe unë kam një ëndërr të tillë. Jam në formë të mirë dhe shpresoj të ftohem nga Kosova U-21”, tha Krasniqi.

Ferizaj është shumë afër ta sigurojë mbetjen në elitë pa barazh dhe për të ndodhur një gjë e tillë atyre i duhen katër pikë në dy ndeshje.

“Ka qenë shumë e vështirë të arrijmë në këtë pozitë, por falë punës së madhe dhe angazhimit kanë ardhur edhe rezultatet”, përfundoi Krasniqi.

Në dy takimet e fundit, Ferizaj luan në udhëtim te KEK-u dhe në fund pret Gjilanin. /Telegrafi/