Shtatë herë kampion në ish-Jugosllavi, Idriz Humolli legjenda e gjallë e “Bodibildingut” të Kosovës

Idriz Humolli, në emisionin “Histori Suksesi” në RTV Dukagjini, ka rrëfyer për jetën dhe karrierën e tij të suksesshme në sportin e Bodibildingut.

Idriz Humolli është shpallur shtatë herë kampion i “Bodibildingut” në ish-Jugosllavi dhe sot ka shkruar libra për fitnesin dhe Bodibildingun.

I lindur dhe rritur në Podujevë, në moshën 16 vjeçare atij i bie në dorë një revistë në të cilën flitej për sportet e ndryshme, por i bëri përshtypje ai i Bodibildingut.

Nga i moment, Humolli me mjetet rrethanore që kishte fillon të merret aktivisht me këtë sport.

Por, ai hasi në rezistencën e prindërve, meqë ata kishin shembuj të ndryshëm nga shokët e Idrizit, që kishin lënë mësimet pasi kishin filluar aktivitetet sportive.

“Nëna më shumë kishte frikë se mos lëndohem, ndërsa babai kishte frikë mos braktisja mësimet apo humbja ndonjë vit”, tregon Humolli.

Rezistencë, Idrizi nuk kishte vetëm në familje. Edhe udhëheqësit e institucioneve sportive hezitonin ta përkrahnin organizimin e një kampionati të Bodibildingut në Prishtinë.

“Unë isha shumë këmbëngulës që kampionati duhej bërë. Prej atij kampionati u hap një dimension i ri, dhe u bë historia e këtij sporti në Kosovë”, tha ai, përcjell Telegrafi.

Humolli, i cili ka shkruar libra për fitnesin dhe Bodibildingun, thotë se me këto libra ka ndryshuar jetën e shumë njerëzve ndër të cilët ka përmendur kampionin e parë të Bodibildingut në Shqipëri.

“Herkulesi” i Kosovës shprehet i kënaqur nga ndihma që ofron sot Ministria e Kulturës për sportin e Bodibildingut, por nuk harron edhe ndihmën nga Komuna e Prishtinës.

Ai tregon se edhe fëmijët kanë ndjekur rrugën e babait, duke korrur suksese në të njëjtat shtigje./Telegrafi/