Serbët në veri të Mitrovicës, protestojnë kundër dhunës politike të Beogradit – kërkojnë gjetjen e vrasësit të Ivanoviqit

Me dhjetëra qytetarë serbë, kryesisht të rinj kanë protestuar sot, në veri të Mitrovicës, kundër dhunës politike, vrasjeve dhe sistemit të padrejtë.

Protesta është mbajtur në sheshin “Mbreti Kral”, me sloganin “1 nga 5 milionët”, ndërkaq ka filluar në ora 18:00.

Njëri nga organizatorët, Marko Jakshiq, para protestuesve tha se organizatorët e kësaj proteste janë të guximshëm, pasi i janë nënshtruar presioneve të ndryshme nga Serbia.

Jakshiq kërkoi që të dihet njëherë e përgjithmonë se kush janë vrasësit dhe urdhëruesit e vrasjes së ish-kryetarit të SDP-së, Oliver Ivanoviqit.

Ai gjithashtu theksoi se viteve të fundit në Serbi, ata nuk ndjehen të lirë.

“Ne të cilët vendosëm që të organizojmë këtë protestë kemi qenë të guximshëm sepse i jemi nënshtruar presioneve. Këtu jemi tubuar që të nderojmë Oliver Ivanoviq, i cili humbi jetën tragjikisht. Duam të dimë kush janë vrasësit dhe urdhërdhënësit e vrasjes së tij. Këto vitet e fundit në Serbi, nuk kemi  liri. Nëse për shkak të një shëtitjeje i tërë aparati shtetërorë i Serbisë është këtu pesë ditë që të ushtroj presion, që njerëzit të ftohen pas asnjë bazë, atëherë ne kemi humbur thellë rrugën.  Mendoj që secili prej nesh ka të drejtë që të mendoj lirshëm, të shpreh qëndrimin e tij dhe të zgjedh lirshëm atë që dëshiron ta përfaqësoj”, ka thënë Jakshiq, raporton Telegrafi.

Ai po ashtu potencoi se nëse iu ndodh ndonjë gjë e keqe përgjegjës për këtë do të jetë, Marko Gjuriq.

“Dua të potencoj diçka se nëse i ndodh dikujt nga ne, çfarëdo gjëje e keqe përgjegjës do të jetë, Marko Gjuriq. Nuk ka më automjete të djegura, kërcënime, thyerje koke etj”, theksoi ai.

Ndërkaq, në këtë protestë mori pjesë edhe ish-deputetja e Kuvendit të Kosovës, Rada Trajkoviq ku bashkë me protestuesit vazhduan të ecin në drejtim të selisë së SDP-së, për të ndezur qirinj në kujtim të ish-liderit të kësaj partie, Oliver Ivanoviq.

Ndryshe, organizatorët e kësaj proteste për disa ditë kanë qenë të kritikuar nga Lista Serbe dhe drejtori i të ashtuquajturës zyra për Kosovën pranë qeverisë së Serbisë, Marko Gjuriq. /Telegrafi/