Mustafa: Diskursi i Hashim Thaçit më shumë trajton territore e pasuri, sesa njerëzit e Luginës së Preshevës (Video)

Kryetari i Këshillit Nacional të Shqiptarëve, Ragmi Mustafa ka thënë se shqiptarët e Luginës së Preshevës kanë nevojë për mbështetje financiare nga Kosova dhe Shqipëria.

Mustafa, në “Dossier D” me Fidan Ramën në RTV Dukagjini, ka thënë se përderisa Hungaria ndihmon komunitetin e vet në Serbi me miliona euro, e Kroacia me disa qindra mijëra euro, shqiptarët e Luginës janë ndihmuar nga Kosova dhe Shqipëria me ndihma simbolike.

Ai ka thënë se është i nevojshëm të krijohet një fond prej 1 milion eurosh për t’u ndihmuar shqiptarët e Luginës së Preshevës.

Kryetari i Këshillit Nacional të Shqiptarëve ka thënë se pas luftës së UÇPMB-së ishte arritur një marrëveshje, por edhe sot e kësaj dite dy nga objektivat e marrëveshjes nuk janë plotësuar.

“Nuk është përshpejtuar zhvillimi ekonomik i rajonit dhe nuk është respektuar parimi i përfaqësimit të reciprocitetit”, tha ai, përcjell Telegrafi.

Mustafa ka thënë se Këshilli Nacional i Shqiptarëve ka kërkuar që edhe çështja e Luginës së Preshevës të jetë një nga temat që duhet të diskutohet në bisedimet me Serbinë.

Duke folur për debatet për kufijtë dhe bashkimin e mundshëm të Luginës së Preshevës me Kosovën, Mustafa ka thënë se ajo që është parë deri më tani, më shumë është diskutuar për territore e pasuri se për popullsinë.

“Kemi një diskurs publik që më shumë trajton territore e pasuri se njerëz. Popullsia e Luginës së Preshevës e do [bashkimin] dhe është e kthyer kah Prishtina. Popullsia e kësaj ane ka kontribuar në proceset që ka kaluar Kosova dhe kanë lidhje familjare me Kosovën”, tha Mustafa.

Ai ka thënë se procesi i negociatave mes Kosovës dhe Serbisë ka shumë të panjohura dhe deri tani nuk dihet se cilat janë kërkesat e Serbisë./Telegrafi/