Ndalja e rrymës në Suharekë e Fushë Kosovë, Njazi Thaqi thotë se nuk është faji i KEK-ut

Që nga  mëngjesi, e deri në mbrëmje në Suharekë ka pasur mungesë të rrymës. Korporata Energjetike e Kosovës, KEK, ka njoftuar se ajo është duke dhënë maksimumin për prodhimin e energjisë.

Drejtori menaxhues i kësaj kompanie, Njazi Thaqi, ka sqaruar se KEK nuk i ka fajet për ndërprerjet e energjisë elektrike me të cilat po përballen qytetarët e Kosovës në këto ditë të ftohta.

Përmes një postimi në Facebook, Thaqi ka sqaruar se kapacitetet maksimale prodhuese të termocentraleve të Kosovës 800 megavat orë energji elektrike dhe se që nga data 13 dhjetor, KEK-u është duke prodhuar me kapacitete të plota.

“Pra prodhimin e kemi 800 MW/h per rrjet dhe nevojat e brendshme qe aktualisht është rreth 870 MW/h”, ka shkruar ai.

Thaqi thotë se ky është obligimi i korporatës që drejton dhe se atë po e përmbushin me përgjegjësi të lartë dhe me një angazhim maksimal të të gjithë punëtorëve.

“Sa i përket reduktimeve për te cilat po na drejtoni ankesa dhe pyetje nuk mund te japim asnjë përgjigje per shkak se nuk është përgjegjësi e jona”, ka shtuar Njazi Thaqi.

Lidhur me ndalesat e sotme në Suharekë dhe Fushë Kosovë, ka folur zëdhënësin e KEDS-it Viktor Buzhala.

Në një deklaratë dërguar mediave ka thënë se ndalesat e sotme në Fushë Kosovë dhe Suharekë nuk kishin të bëjnë me riparime por për shkak të punimeve të KOSTT-it.

Sipas tij, me kërkesë të KOSTT-it, në Fushë Kosovë është dashur domosdoshmërisht të vendoset një transformator shtesë në asetet e tensionit të lartë.

“Kjo ka ndodhur për shkak të kapaciteteve të reduktuara të KOSTT-it, të krijuara edhe nga rritja e shpejtë e rezidentëve në këtë komunë. KEDS e ka zgjidhur problemin e mbingarkesave me shtimin e transformatorëve nga dy në tre, por tejkalimi komplet i mbingarkesave ka të bëjë me shtimin e kapaciteteve të transmisionit, që nuk janë kompetencë e jona”, ka theksuar Buzhala.

Ai ka sqaruar edhe ndalesën e energjisë elektrike në Suharekë.

“Ndërkohë, gjatë punimeve në Suharekë të bëra nga KOSTT, KEDS e ka shfrytëzuar këtë hapësirë për të shpërndarë ngarkesën në mes të transformatorëve në mënyrë që të zgjidhet çështja e furnizimit me energji elektrike për qytetarët e asaj komune. Ndryshe, do të ishte e pamundur që KOSTT-i të furnizonte të gjitha dalje”, ka përfunduar Buzhala./Telegrafi