Vrasja aksidentale në Gjakovë ndodhi në ballkon të shtëpisë, viktima ishte duke e pastruar armën

Policia e Kosovës për rajonin e Gjakovës ka dhënë detaje për vrasjen aksidentale në Gjakovë.

Policia referuar deklaratave të familjarëve bën të ditur se derisa ishin duke biseduar në ballkon të shtëpisë burrë e grua, Xh.Sh, egjiptas/kosovar si dhe R.Sh e moshës 61 vjeçare, egjiptase/kosovare, është dëgjuar një e shtënë me armë.

Siç bëhet e ditur familjarët menjëherë kanë dal dhe e kanë vërejtur babanë e tyre duke bërë përpjekje të ndihmonte  të plagosurën-nënën e tyre, të cilën ata e kanë transportuar në qendrën emergjente në spitalin e Gjakovës, ku nga plagët e marra pas pak viktima kishte vdekur.

“Më datën 20. 08. 2018 në ora 00:05 minuta Stacioni Policor në Gjakovë përmes telefonit është njoftuar nga Emergjenca e spitalit se kanë pranuar një person të lënduar me armë zjarri. Menjëherë policia ka shkuar në Emergjencë dhe nga mjeku kujdestar është konfirmuar se personi i plagosur nga arma zjarrit veç kishte vdekur”, thuhet në njoftimin e Policisë.

Policia në vend ngjarjes ka gjetur armën me të cilën dyshohet se është plagosur viktima.

Sipas deklaratave të familjarëve respektivisht fëmijëve të tyre bashkëshortët kanë jetuar në harmoni dhe nuk kanë pasur probleme në mes vete dhe dyshimet e tyre janë se rasti ka qenë aksidental dhe se nëna e tyre në atë moment ka qenë duke e pastruar armën me të cilën dyshohet se është kryer vepra.

Bashkëshorti i viktimës ishte larguar nga shtëpia dhe më vonë është arrestuar nga policia në lagjen e tij dhe bazuar në deklaratën e tij viktima kishte pasur armën në dorë të cilën ishte duke e pastruar dhe aksidentalisht i ka shkrepur.

Ai deklaron se ishte larguar nga shtëpia për shkak të gjendjes së rëndë emocionale.

Me urdhër të prokurorit të shtetit trupi i viktimës është dërguar në Institutin e mjekësisë ligjore për autopsi dhe në bashkëpunim dhe koordinim me prokurorin rasti po hetohet nga Sektori Rajonal për hetime nga drejtoria rajonale e policisë në Gjakovë.