Lipa: Action Bronson nuk përdori marihuanë, ai e kishte mbështjellë duhanin për shou

Organizatori i Festivalit Sunny Hill, Dukagjin Lipa, i ka përgënjeshtruar njoftimet se Action Bronson ka tymosur marihuanë gjatë performancës së tij në parkun e Gërmisë në Prishtinë.

Reperi me origjinë shqiptare ishte shoqëruar në stacionin policor me dyshimin se ka poseduar dhe ka konsumuar substancë të dyshuar narkotike.

https://www.instagram.com/p/BmMkeaslY1Q

“I njëjti nën shoqërimin e njësive policore është dërguar në stacion policor për intervistim dhe procedura të mëtutjeshme policore. Pas intervistimit me urdhër të prokurorit kompetent i njëjti është liruar”, kishte thënë zyra për informim e Policisë.

Lexo po ashtu Lajmet për Action Bronson

Ndërkohë, Dukagjin Lipa, babai i këngëtares Dua Lipa, ka theksuar se Bronson nuk ka tymosur marihuanë , porse e ka mbështjellë duhanin në atë formë.

“E ka mbështjellë duhanin në mënyrë të tij për shou, të cilin e bën çdo kund në botë. Domethënë nuk ka qenë rasti ai (nuk ka pasur marihuanë). Por, megjithatë, policia e ka kryer një punë shumë të mirë”, ka deklaruar Lipa për Klan Kosova.

Action Bronson, emri i vërtetë i të cilit është Arian Arslani, ka performuan në skenën e Sunny Hill të shtunën mbrëma, në natën e dytë të festivalit.

Festivali, i cili ka nisur të premten (10 gusht), me yllin kryesor Dua Lipa, u përmbyll të dielën (12 gusht) me performancën e DJ-it me famë botërore, Martin Garrix. /Telegrafi/