Deri javën e ardhshme deputetët sërish do të votojnë për marrëveshjen me Greqinë

Në Kuvendin e Maqedonisë sot është dorëzuar vendimi i presidentit Gjorge Ivanov, me të cili ai vendosi veto për Ligjin për ratifikimin e marrëveshjes me Greqinë.

Kryetari i Kuvendit Talat Xhaferi tani ka afat prej 30 ditësh (nga votimi i ligjit për ratifikimin e marrëveshjes) që ta vendos sërish në votim në seancë plenare, përcjell Telegrafi Maqedoni.

Lexo po ashtu Gjorge Ivanov vendos veto për marrëveshjen me Greqinë, tregon arsyet e tij

Sipas AIM, pasi Xhaferi ta rishikojë vendimin e presidentit Ivanov dhe sipas aktiviteteve të planifikuara në Kuvend, do ta caktojë seancën plenare për votimin e sërishëm të ligjit. Ndërsa paralajmërohet se kjo do të ndodh deri në fund të kësaj ose javës së ardhshme, pasi kryetari i Kuvendit nuk do ta pres fundin e afatit, gjegjësisht 20 korrikun.

Përndryshe, deputetët e Kuvendit të Maqedonisë me 69 vota “për” dhe 40 “kundër” ratifikuan marrëveshjen me Greqinë më 20 qershor, ndërsa të njëjtën ditë u nënshkrua nga kryetari i Kuvendit dhe u dërgua për tek presidenti, i cili sot publikoi vendimin e tij për mosdekretimin e ligjit për ratifikimin e marrëveshjes.

Tani sërish deputetët duhet ta bëjnë lëvizjen e radhës. Për të ratifikuar edhe një herë marrëveshjen për emrin me Greqinë, “pro” duhet të votojnë 61 deputetë, me çka këtë herë presidenti Ivanov sipas Kushtetutës është i detyruar ta nënshkruaj dekretin. /Telegrafi/