“Take a shot” bënë bashkë Granit Dërgutin dhe Capital T, dyshja flasin për ‘gjuajtjen e radhës’

Reperët Capital T dhe Granit Dërguti kanë përfunduar punën për projektin e tyre më të ri “Take a shot”.

Dyshja e njohur e studios “Authentic Entertainment”, pritet që për pak ditë të publikojnë këtë klip, teksa në një bisedë për Telegrafin kanë shpalosur detajet ekskluzive të projektit të tyre më të ri.

“Bashkëpunimi ynë i ri titullohet “take a shot”. Muzikën e ka realizuar vet Granit Dërguti, ndërsa tekstin e kemi shkruar së bashku të dy. Është një këngë interesante, të cilën besoj publiku do ta mirëpresë”, tha Capital T për Telegrafin.

Ndërsa Granit Dërguti, tregoi se si ka lindur ideja për bashkëpunim me Kapon, duke thënë se janë gjithmonë të mirëpritura duetet me një artist si ai.

“Nuk ka ide për bashkëpunim mes meje dhe Trimit (Capital T). Mjafton që një projekt që e punoj, t’i pëlqejë edhe atij dhe ai projekt realizohet, është e natyrshme kështu pasi që përveç se jemi që të dy pjesë e “Authentic”, unë dhe Trimi jemi së pari shokë. Kështu ka ndodhë edhe me këtë bashkëpunim, si edhe të tjerat që i kemi pasur më herët, mirëpo secilën herë me këngë me të mira. Ju premtoj se kjo që po vjen do t’ju pëlqej shumë”, tha Granit Dërguti për Telegrafin.

Lexo po ashtu Hitet e vjetra që u ripërpunuan nga artistët e rinj shqiptarë

Tutje, këngëtari tregoi për tematikën që shtjellon kënga, si dhe xhirimet e klipit, të cilat kanë përfunduar pak ditë më parë.

“Kënga është një këngë me tipare verore, jo vetëm pse po afron kjo sezonë por pse unë mundohem gjate gjithë kohës t’a shpreh disponimin dhe atë që e ndjej në muzikë, e kjo është ajo që po e ndjej tani. Kënga flet për gjininë e bukur, pra femrat, si në shumicën e këngëve të mia, sepse mundohem t’ju kushtoj kohë vetëm gjërave të mira e të bukura. Xhirimet e klipit sapo kanë përfunduar dhe kënga do të publikohet gjatë këtyre ditëve. Çka mund t’ju them është që klipi është punuar me shumë kujdes dhe po punohet ende, e për detaje të tjera do t’i tregojmë në ditët në vazhdim”, ka thënë më tej këngëtari Dërguti.

Në përfundim të bisedës, Graniti tregoi për planet e tij dhe projektet tjera të afërta, duke thënë se nuk e ka ndër mend të ndalojë së sjelli gjëra të reja.

“Vendi ku unë shprehem më së miri është muzika. Nuk dua vetëm të flas, për një kohë të shkurtër do ta shihni punën time dhe këngët e mia të cilat po pres me padurim t’i dëgjoni, e të cilat i kam punuar me shumë dashuri dhe qejf. Thuajse çdo muaj do të publikoj projekte të reja dhe pres me padurim të shoh reagimin e publikut”, ka përfunduar Granit Dërguti.

Lexo po ashtu Të gjitha lajmet nga Estrada Shqiptare

Telegrafi ka përcjell xhirimet e klipit “Take e shot”, teksa përgjatë artikullit keni pasur mundësinë të njiheni me fotografi nga prapaskenat e xhirimeve.

Stili i përsosur në dukje dhe performanca e veçantë nuk do të mungojnë as në këtë klip të radhës nga djemtë e talentuar të “Authentic”. /Telegrafi/

https://www.instagram.com/p/BiRzz48H-C4/?taken-by=granitderguti