Policia në Jarinje, për t’ua ndaluar hyrjen në Kosovë zyrtarëve serbë Vulin dhe Gjuriq (Foto)

E plotësuar: Policia e Kosovës edhe një herë ka bërë të ditur se prezenca e shtuar e forcave të saj në veri të Mitrovicës ka të bëjë vetëm me zbatimin e vendimit të Qeverisë lidhur me ndalesën e hyrjes në Kosovës të zyrtarëve serbë Aleksandër Vulin dhe Marko Gjuriq. Forca të shtuara të Njësisë Speciale janë parë edhe në oborrin e Drejtorisë Rajonale të Policisë së Kosovës në Pjesën jugore të Mitrovicës.

Policia ka apeluar tek qytetarët që të mos bien pre e dezinformatave lidhur me këtë rast.

“Policia e Kosovës në kuadër të autorizimeve dhe kompetencave ligjore ka ndërmarrë veprime në drejtim të dislokimit të njësive përgjegjëse në terren në pjesën veriore të Kosovës, me të vetmin qëllim  zbatimin e vendimit të Qeverisë dhe nuk ka qëllime tjera.

Në kuadër të kësaj dëshirojmë t’i informojmë të gjithë qytetarët tanë, në veçanti ata në veri të Kosovës mos të bien pre të çfarëdo dezinformate lidhur me angazhimet tona në atë pjesë”, thuhet në njoftim.

Ne mbetemi të përkushtuar në zbatimin e rendit dhe ligjit si dhe ofrimin e shërbimeve policore për të gjithë qytetarët e Kosovës pa dallim.

Ndryshe, Forca të shtuara të Njësisë Speciale janë parë edhe në oborrin e Drejtorisë Rajonale të Policisë së Kosovës në Pjesën jugore të Mitrovicës. /Telegrafi/

—————————

Policia e Kosovës përmes një njoftimi për media, ka bërë të ditur se forcat e shumta të policisë në Jarinje kanë dalë për shkak të ndalimit të hyrjes në Kosovë të zyrtarëve serbë Aleksandër Vulin dhe Marko Gjuriq.

“Policia e Kosovës bazuar në planifikimet e saja policore, në zbatim të vendimit të Ministrisë së Punëve të Jashtme të Republikës së Kosovës (RKS) për ndalim të vizitës në Kosovë të zyrtarëve serbë Vulin dhe Gjuriq, ka angazhuar njësi relevante policore për implementim të këtij vendimi.

Lexo po ashtu ​Forca të shtuara të Policisë në Jarinje

Sipas informacioneve dhe deklarimeve të vetë zyrtarëve serbë, të njëjtit kanë deklaruar se edhe përkundër vendimit zyrtar të autoriteteve të Kosovës për ndalim të hyrjes së tyre, ata do të realizojnë vizitën e tyre të planifikuar në veri të Mitrovicës”, thuhet në njoftim.

Më tej Policia e Kosovës ka sqaruar se me qëllim të zbatimit të vendimit zyrtar të autoriteteve shtetërore, ka angazhuar njësi relevante policore të cilat do të veprojnë konfrom situatës në raport me vendimin e MPJ-së së RKS-së.

“Ndërsa do të ju lejohet hyrja vetëm personaliteteve të cilët do të kenë leje zyrtare të autoriteteve të shtetit të RKS-së, për të realizuar vizitat e tyre të planifikuara sipas kërkesës zyrtare”, thuhet në njoftim. /Telegrafi/