Kosova dhe Franca për bashkëpunim në pronësinë industriale

Zëvendësministri i Ministrisë së Tregtisë dhe Industrisë Faton Thaçi, priti në takim Joseph Giustiniani, atashe për bashkëpunim në ambasadën e Francës në Kosovë, i shoqëruar edhe nga drejtori i Institutit Kosovar për Pronësi Industriale, Veli Hoti, njofton MTI, përcjell Telegrafi.

Temë e diskutimit në këtë takim ishte bashkëpunimi i shtetit Francës me shtetin e Kosovës në fushën e pronësisë industriale (intelektuale), konkretisht në treguesit gjeografikë.

Zv/ministri Thaçi e njoftoi atasheun Giustiniani me të arriturat e Agjencisë së Pronësisë Industriale, që vepron në kuadër të MTI-së, në përgatitjen e infrastrukturës ligjore dhe institucionale konform direktivave të BE-së, avancimet në teknologjinë e bazës të të dhënave për markat tregtare, pronësinë intelektuale dhe treguesit gjeografikë.

Ne vazhdim, Thaçi theksoi se procedurat për aplikim, publikim, komunikim, regjistrim dhe të tjera janë tashmë të ndërtuara dhe të zhvilluara nga API, kështu që nuk kërkohet ndonjë ri-rregullim, sepse janë të njëjta apo të ngjashme me regjistrimin e objekteve tjera të pronës industriale: marka tregtare, patenta dhe dizajne industriale.

Më tutje, atasheu francez Giustiniani e siguroi Thaçin se do të ketë mbështetje të pakursyer në drejtime të ndryshme, qoftë teknike, financiare dhe me ekspertë francezë dhe në koordinim në mes MTI-së, Ministrisë se Bujqësisë, Pylltarisë dhe Zhvillimit Rural dhe Shoqatës se Prodhuesve të Djathit te Sharrit, që në muajt në vijim të mbahen takime dhe punëtori të ndryshme me ekspertë nga Franca dhe ekspertë që mbulojnë këto fusha në ministritë relevante.

Thaçi, po ashtu njoftoi atasheun se Kosova ka mundësi të prezantojë edhe tregues tjerë gjeografikë, siç janë verërat e Kosovës të cilat shquhen për kualitet dhe cilësi të lartë në tregun e brendshëm dhe rajonal. Më pas, z. Thaçi e siguroi atasheun se duke filluar nga muaji mars do të intensifikohen takimet në mes ministrive përkatëse të Kosovës dhe ambasadës franceze në Kosovë me ministritë dhe ekspertët e shtetit mik të Francës. /Telegrafi/