Flet menaxheri i “ON Records”, Met Elshani: Largimi i Getinjos dhe Mozzik, i paparalajmëruar dhe kundër rregullave të kontratës

Dy reperët e njohur Mozzik dhe Getinjo , kanë dhënë dorëheqjen nga “ON Records”, labeli nga i cili zhvilluan karrierën e tyre dhe ishin nën menaxhim tash e disa vite.

Një largim i tillë dhe i papritur vuri në pikëpyetje shumë prej fansave se pse ka ndodhur, ndërsa vet dyshja Mozzik dhe Getinjo dolën me deklaratë publike duke treguar se një largim i tillë ishte vendim i tyre, ndërsa akuzuan label-in se kanë fituar qindra mijëra euro në kurriz të tyre.

Por, i kontaktuar nga Telegrafi, menaxheri i label-it “On Records”, Mehmet Elshani, tregoi se dorëheqja e papritur e dy reperëve i ka befasuar, teksa e quan jo të drejtë largimin e pa paralajmëruar.

“Kemi qenë të befasuar, pasi ka qenë një vendim krejt i papritur. Nuk kemi pasur probleme, as fizike e as të tjera siç është aluduar në media. Pavarësisht se publiku mendon që mund të ketë qenë e menjëhershme dorëheqja, mesa duket Getinjo dhe Mozzik e kanë planifikuar prej ditësh një largim të tillë”, tha Elshani për Telegrafin.

Tutje, ai tregoi se një largim i tillë ndodhur jo konform rregullave të kontratës dhe ligjeve në fuqi.

“Mesa duket, ata nuk i kanë marrë parasysh pasojat. Kontrata e tyre është ende valide, dhe largimi i menjëhershëm dhe pa paralajmërim është kundër rregullave të kontratës, dhe si i tillë do të ndiqet me procedurë penale konform rregullave të ligjeve në fuqi”, tregoi më tej menaxheri i “ON Records”, njëherësh ish-menaxheri i dy reperëve në fjalë.

Duke qenë se nuk kishin debate, por përkundër një bashkëpunimi të mirë, Meti thotë se doli i zhgënjyer nga dy rap-artistët, të cilët folenë e zhvillimit të famës dhe karrierës, e kishin label-in “ON Records”.

“Ne i kemi marrë ata vite më parë kur nuk ishin emra të njohur, iu kemi ofruar ndihmë, i kemi marrë në label dhe iu kemi ofruar kontratën, gjë të cilën ata nuk e respektuan. Famën më të madhe dyshja në fjalë e arritën falë “ON Records”, e tani ky largim i befasishëm është aspak i rregullt nga ana e tyre, megjithëse do të ndiqen penalisht. Por sigurisht, janë një lloj ‘kapriço’ të artistëve që pasi iu hyjnë vetja në qejf dhe e prekin famën, shkojnë dhe bëjnë gjëra të tilla”, tregon ai më tej.

Me largimin e Getinjos dhe Mozzikit, labeli “ON Records” mbetet me plot gjashtë këngëtarë nën menaxhim, gjë për të cilën menaxheri i këtij label-i thotë se do të vazhdojë punën me ta.

“Me Getinjon kemi pasur kontratë edhe për gjashtë vite të tjera, ndërsa me Mozzik edhe për pesë, ndërsa me largimin e tyre kontratat vazhdojnë të jenë valide edhe për gjashtë artistët e tjerë që kemi nën menaxhim: Kida, Endri Elshani, Fero, Rina Balaj, Enis Bytyqi dhe Nadi, dhe me ta do të vazhdojmë punën për projektet e reja”, përfundoi Elshani për Telegrafin.

Ndërkohë, të sapo-larguarit nga “ON Records” nuk kanë bërë të ditur nëse kanë vendosur t’i bashkëngjiten ndonjë label-i tjetër tani për projektet e tyre të reja. /Telegrafi/