Sela: Zaev tani ka një post ministror më tepër, por ka humbur një partner serioz për reforma

Me votimin e ministrit të ri për shëndetësi dhe daljen e Aleancës për Shqiptarët nga koalicioni qeveritar, kjo Qeveri e humbi moralin, tha kryetari i Aleancës për Shqiptarët, Ziadin Sela në emisionin “Top Tema”.

“Sqarimi i vetëm që më bëri Zoran Zaev gjatë takimit tonë në lidhje me pozitën e zëvendës ministrit për Reforma që ja ofroi Aleancës për Shqiptarët në shkëmbim të Ministrisë së Shëndetësisë ishte se Ali Ahmeti e kërcënon me dalje nga koalicioni qeveritar në rast se kuadër i ASH-së edhe më tej mbetet Ministër i Shëndetësisë”, sqaroi Sela.

Sipas tij, në këtë rast kryeministri Zaev ka fituar një post ministror më shumë, por ka humbur një partner shumë serioz në lidhje me refomat dhe tejkalimin e krizës politike në vend.

Sela theksoi se në politikën e fshehtë të BDI-së ka një qëllim të fshehtë për shkak të rejtingut që i bie çdo ditë e më shumë te votuesit shqiptarë, Zaev ka parë interes për vete, të mer një resor të mirë siç është Ministria e Shëndetësisë dhe të vazhdojë, por jo me reforma në drejtësi, por me planet e tij të biznesit.

“Në fillim Qeveria mbante qëndrimin se nuk do të ndërtohet Qendra e re klinike në Shkup sepse ka shumë probleme tjera në shëndetësi dhe ajo nuk është zgjidhje. Për këtë shkak Ministria e Shëndetësisë nuk ishte tërheqëse për kryeministrin dhe partnerët tjerë të koalicionit. Domethënë, kjo ministri nuk iu dha ASH-së për shkak të Taravarit, siç thonë lojtarët politik”, tha Sela.

Ai poashtu theksoi se shqiptarët në Maqedoni tanimë 15 vite jetojnë në monizëm, ka vetëm një parti politike që fiton çdo zgjedhje në vend./Telegrafi/