Serbia dëshiron marrëdhënie miqësore, thonë se ata nuk paraqesin rrezik për Maqedoninë

Republika e Serbisë dëshiron të vendosë dhe të mbajë marrëdhënie miqësore me Republikën e Maqedonisë dhe nuk dëshiron të përfshihet në lojëra të fshehura, tha ministri për punë të jashtme të Serbisë Ivica Daçiq në konferencën për shtyp pas takimit me homologun e tij të Maqedonisë, Nikolla Dimitrov në Nish.

“Dua të përcjell deri te populli i Maqedonisë se nga veriu, nga Republika e Serbisë nuk i kanoset asnjë rrezik. Republika e Serbisë nuk ka për qëllim të kontestojë asgjë në lidhje me Republikën e Maedonisë, as shtet, as komb, asgjë tjetër”, tha ministri për punë të jashtme të Serbisë, Ivica Daçiq.

Ai shtoi se komunikimi ndërmjet dy shteteve do të vazhdojë edhe më tej dhe tha se kryeministri i Maqedonisë, Zoran Zaev është i ftuar për vizitë në Beograd dhe siç tha ai, ajo do të jetë vizitë që do t’i rregullojë relacionet e besimit ndërmjet vendeve, në veçanti me kryetarin e Serbisë, Aleksandar Vuçiq dhe se dy ministritë për punë të jashtme do të sillen dhe do të veprojnë bazuar në këto marrëdhënie të përmirësuara.

“Biseduam për shkaqet e këtyre disa ditëve me turbulenca në marrëshëniet tona bilaterale. Mendoj se sfera e kundërzbulimit është shumë delikate dhe sa më shumë që spekulojmë në opinion krijojmë tollovi më të madhe, por besoj se dy pika duhet të ceken. E para, duhet të punohet në qartësimin e atyre informatave të përmendura dhe e dyta, nëse ato informata dalin të sakta ashtu siçu përmendën, gëzohem që nuk involvojnë Qeverinë e Republikës së Maqedonisë”, tha ministri për punë të jashtme të Maqedonisë, Nikolla Dimitrov.

Dimitrov përfundoi duke thënë se nga kjo situatë e shohim rëndësinë e pasjes së dialogut ndërmjet shteteve fqinje, të sinqertë dhe të hapur dhe të jemi të afërt në marrëdhëniet ndërfqinjësore dhe se përpara shihet vetëm një rrugë e ajo është rruga e përbashkët evropiane e gjithë rajonit./Telegrafi/