Matoshi: Ganimete Musliu t’i kërkojë falje publike Ilir Dedës

I sapoaderuari në Aleancën për Ardhmërinë  e Kosovës, Halil Matoshi, ka reaguar ndaj deklarimeve të deputetes së PDK-së, Ganimete Musliu, që i bëri në drejtim të atij të Alternativës, Ilir Dedës.

Në një status të publikuar në facebook, Matoshi thotë se Musliu duhe të kërkojë falje publike për deklarimet e saj të cilat po cilësohen ofenduese për secilin qytetar të Kosovës.

”Përmendja e origjinës së nanës së akëcilit, në kontekste negative asht primitivizëm dhe fyemje për secilin qytetar të devotshëm të Republikës së Kosovës por edhe për tanë njerëzimin! Në këtë rast jam në anën e Ilir Dedës dhe solidarizohem me të! Dhe Ganimete Musliu duhet më i kërku falje publike. Kërkimfalja asht i vetmi akt qytetar në këtë rast!” shprehet Matoshi, njofton Klan Kosova.

Në një debat televiziv në Ora e Fundit në Klan Kosova, Deputetja e PDK-së, Ganimete Musliu tha se Kosova është çliruar më 11 qershor nga dajtë e atij që ka deklaruar se Kosova do të çlirohet më 11 qershor 2017 për herë të dytë, duke ju referuar Ilir Dedës dhe origjinisës së nënës së tij për të cilen thuhet se është serbe.