Haziri: Në zgjedhjet e ardhshme, do ta mposhtim PDK-në (Video)

E plotësuar: Kryetari i Gjilanit, Lutfi Haziri – njëkohësisht nënkryetar i partisë qeverisëse, LDK – është i bindur se subjekti i tij do të dal i pari në zgjedhjet e ardhshme, duke e mposhtur edhe PDK-në.

Këto komente ai i bëri në emisionin InfoBox të RTV Dukagjinit, duke deklaruar se nuk e synon postin e të parit të Lidhjes Demokratike, që aktualisht e mban kryeministri Isa Mustafa.

“LDK-ja është shumë afër numrave që të dalë e para në Kosovë, sipas sondazheve të fundit, që janë serioze dhe neutrale e që nuk janë porositura nga LDK. Kjo i bie se në zgjedhjet e ardhshme, LDK do të dalë e para në vend”, tha ai.

Ai foli edhe për demarkacionin e kufirit me Malin e Zi, që sipas tij duhet të votohet. Ndërkaq, për zgjedhjet lokale, ai tha se në Gjilan shpreson që kandidati fitues të jetë nga LDK, porse ai nuk do të rikandidohet. /RTV D/Telegrafi/

https://youtu.be/0ejiBophYtI?t=4481

Haziri: Koalicioni qeverisës i ka votat për Demarkacionin

Nënkryetari i Lidhjes Demokratike të Kosovës (LDK), Lutfi Haziri, ka theksuar se koalicioni qeverisës i ka votat për të kaluar Marrëveshjen për Demarkacionin e kufirit në mes Kosovës dhe Malit të Zi.

Ai ka theksuar në emisionin InfoBox të RTV Dukagjinit, se votat janë porse duhet, sipas tij, të mobilizohen që deputetët të votojnë pa qenë nën presion dhe pa shantazhe.

“Ky koalicion i ka pasur votat me e zgjedh Isa Mustafën kryeministër dhe Hashim Thaçin president. Në momentin kur votojnë 30 deputetë të LDK-së pro një çështje, cila është arsyeja që tre deputetë të votojnë kundër. Do të duhej që këta persona, në të ardhmen, të gjejnë forume politike, ku mendimi i tyre përputhet me vendimet e partisë”, ka shtuar Haziri. /Telegrafi/