Historike, Obama do të vizitojë Hiroshimën

Barak Obama do të vizitojë Hiroshimën gjatë këtij muaji, duke u bërë i pari president amerikan në detyrë që udhëton në qytetin japonez ku SHBA-të hodhën bombën bërthamore.

Vizita do të jetë pjesë e turit në Azi më 21-28 maj, gjatë të cilit kreu i Shtëpisë së Bardhë do të shkojë edhe në Vietnam si dhe do të marrë pjesë në takimin e G7-s që do të mbahet në gadishullin japonez të Ise-Shimës.

Në një komunikatë nga zyra për shtyp e Obamës thuhet: “Presidenti do të bëjë një vizitë historike në Hiroshima së bashku me kryeministrin japonez Shinzo Abe, për të ritheksuar angazhimin e tij të vazhdueshëm për paqen dhe sigurinë në një botë pa armë bërthamore”.

Këshilltari i presidentit amerikan për komunikimin, Ben Rods, tha se kreu i Shtëpisë së Bardhë nuk do të cekë temën e përdorimit të bombës bërthamore në Luftën e Dytë Botërore, por “do të ofrojë një vizion me fokus në të ardhmen e përbashkët”.

Bomba në Hiroshima më 6 gusht 1945 vrau 140 mijë njerëz, dhe së bashku me atë të hedhur në Nagasaki tri ditë më pas shënuan fundin e Luftës së Dytë Botërore.

Xhimi Karter e ka vizituar Hiroshimën, por pasi e kishte lënë detyrën.