Shqiptarët shkëlqejnë në Zvicër, tash është momenti i Erës

Artistët shqiptarë nga Kosova po e pushtojnë Zvicrën. Dhe, kështu nuk është nga sot… Në fillim ishte Rita Ora, vajzë e prindërve shqiptarë të Kosovës. Pastaj erdhi 19-vjeçarja Dua Lipa me hitin e saj “Be The One”, ndërsa tash po vjen koha e Era Istrefit.

Me këtë prezantim të shkurtë portali i radios zvicerane Radio Energy hyn në temë: bëhet fjalë për nxjerrjen në votim elektronik të këngës “BonBon” të Era Istrefit dhe asaj “Lah sie redä”, të reperit të njohur zviceran, Bligg.

Era Istrefi në vendin e saj tashmë vlerësohet si një yll i madh i muzikës pop. Këngëtarja dhe tekstshkruesja 22 vjeçare është shumë bindëse me pamjen e saj “cool” dhe me stilin e jashtëzakonshëm – thuhet në përshkrim, ndërsa transmeton Albinfo.

Me këngën e saj “BonBon”, ajo aktualisht po i “shpartallon” platformat e mëdha evropiane si Shazam, Spotify dhe iTunes.

“Të shohim pra: Zvicra i pëlqen artistët shqiptarë dhe muzikën e tyre! Madje, ndoshta më shumë se sa muzikën zvicerane?”, thuhet në prezantim.

Ndërsa në grafikonin që pasqyron pëlqimet e shikuesve figuron se për Era Istrefin kanë votuar 82 për qind, ndërsa për Blig vetëm 18 për qind të shikuesve.