Milani shitet te sheikët

Historia e gjatë dhe pa asnjë rezultat pozitiv me biznesmenin tajlandez, Mr. Bee duket se do të harrohet shpejt, pasi Corriere dello Sport raporton lajme të bujshme për të ardhmen financiare të Milanit.

Kuqezinjtë kanë arritur një marrëveshje të përbashkët me Fondin Sovran të Katarit, “QIA” dhe këta të fundit kanë bërë një çmenduri, duke e blerë klubin kuqezi për 750 milionë euro.

Buxheti i fondit të Katarit zotëron shifra marramendëse ku deri tani buxheti është 600 miliardë dollarë, të konvertuara në 526 miliardë euro. Ky fond nuk është i panjohur në Evropë, pasi përfaqësuesi i saj, Naser Al-Khelaifi në vitin 2011 ka derdhur shifra të mëdha duke blerë klubin e PSG-së.

Tashmë fansat kuqezi nuk duhet të presin më Mr. Bee për të ndarë mendjen, pasi në skenë doli Fondi Sovran i Katarit që duket se do të ndërtojë një Milan që do të ngjallë frikë.

Nëse biznesmeni tajlandez kishte premtuar 480 milionë euro investime, duke kërkuar 48% të klubit, arabët kanë vënë në tavolinë shumë herë më shumë duke zotëruar të gjithë “djallin”.

Pak ditë më parë, Silvio Berlusconi kishte deklaruar se Milani mund t’i shitet kompanive kineze, të cilat premtonin një investim prej 600 milionë euro.

Shifra që arabët pritet të investojnë për Milanin, mund t’i japë fund epokës legjendare të Silvio Berlusconit, i cili në 30 vitet e fundit ka shijuar trofe të shumtë me kuqezinjtë.

Ka ardhur koha që Milani të rikthehet magjik dhe me 750 milionë euro mund të bëhen çudira.