Delawie: Kauza për kufirin, e rreme

Ambasadori i SHBA-së në Prishtinë, Greg Delawie, ka deklaruar se kufiri i Kosovës me Malin e Zi është në rregull dhe se kauza e disa politikanëve për këtë çështje është e rreme.

“Në fakt kufiri mes Kosovës dhe Malit të Zi është gjetur se është identik si ai që ka qenë me dekada”, ka deklaruar Delawie në promovimin e doracakut për dhunën në familje.

Ai ka lavdëruar punën e komisionit vendor për Demarkacion me Malin e Zi.  Sipas tij, kauza e disa politikanëve për kufirin është e rreme.

“Në fakt pika kufitare që i ka ndarë këto dy vende është identike me atë që i ka ndarë të dyja vendet me shekuj. Përpjekjet e disa politikanëve që të japin disa teori të tyre bizare, për një çështje që është e vendosur me shekuj, është vetëm një përpjeke e tyre për retorikë nacionaliste dhe për përfitime politike. Kjo kauzë e rrejshme duhet lënë prapa krahësh”, ka thënë ai.

Ambasadori amerikan u ka bërë thirrje politikanëve që të merren me çështje që përmirësojnë jetën e qytetarëve.

“Duhet të merremi me gjëra të rëndësishme si papunësia, korrupsioni dhe integrimet evropiane, sepse këto çështje kanë ndikim në jetën e qytetarëve”, ka thënë Delawie, raporton RTK.

Edhe Ambasada e SHBA-ve në Kosovës e ka përkrahur raportin e komisionit ndërkombëtar për demarkacionin.

“Ne jemi të pajtimit me ftesën e Komisionit drejtuar Republikës së Kosovës dhe Republikës së Malit të Zi për të ndërmarrë hapa në përmirësimin e menaxhimit të kufirit dhe thellimit të bashkëpunimit. Shpresojmë se palët do ti rishikojnë me kujdes të gjeturat në raport dhe do ti kthehen punës së rëndësishme që kanë, për ta çuar Kosovën përpara në rrugën e saj drejt institucioneve Euro-Atlantike”, thuhet në deklaratën e Ambasadës amerikane në Prishtinë, për rishikimin e procesit të përcaktimit të vijës kufitare.