Nga qershori çmimi i naftës ka renë për 20%

Në kohën kur prodhimi i naftës po rritet, kërkesa është në rënie dhe për rrjedhojë edhe çmimet. Referuar kësaj situate, analistët mendojnë se tregu global i naftës është në prag të një ndryshimi shumë të rëndësishëm: nga një epokë e mungesës së naftës, në epokën e bollëkut.

Çmimet e naftës kanë rënë me rreth 20 për qind që nga muaji qershor, pavarësisht rritjes së riskut në vendet furnizuese, si Iraku apo Siria. Shumë investitorë dhe tregtarë po marrin parasysh se 2015 do të jetë viti i “bollëkut” për shkak se prodhimi në SHBA është në nivele rekord.

Po ashtu, rënia e kërkesës ka përhapur spekulime se në takimin e muajit të ardhshëm, Organizata e Vendeve Eksportuese të Naftës, OPEC, mund të ulë prodhimin për herë të parë në gjashtë vitet e fundit.

Por pavarësisht kësaj, ekspertët mendojnë se tendenca do të vazhdojë të jetë në rënie. Importi i naftës nga SHBA ka rënë me shpejtësi, ndërsa prodhimi vendas është rritur në nivelin më të lartë në 30 vitet e fundit.

Rritja ekonomike në Kinë dhe Europë është ngadalësuar dhe për rrjedhojë edhe kërkesa për naftë. Ajo që po ndodh në tregun e naftës paraqet ribalancimin dhe ndikimin që po jep prodhimi i madh në SHBA. Pavarësisht trazirave në Libi, Irak dhe Ukrainë, analistët mendojnë se tendenca në terma afatgjatë do të vazhdojë të jetë në rënie. /Telegrafi/