FMN interesohet për Brezovicën

Ministrja e Tregtisë dhe Industrisë, Hykmete Bajrami, priti në takim përfaqësuesin rezident të Fondit Monetar Ndërkombëtar në Kosovë, Ruud Vermeulen, të cilit i uroi punë të mbarë në Kosovë.

Përfaqësuesi i FMN-së në Kosovë, Ruud Vermeulen, shprehu interesimin e tij rreth implementimit të projekteve me interes kapital për vendin, përfshirë projektin për Zhvillimin e Qendrës Turistike të Brezovicës, Fondin Kosovar për Garantimin e Kredive si dhe Ligjin për Investime Strategjike.
Ministrja Bajrami e ka njoftuar Vermeulen rreth aktiviteteve të Ministrisë së Tregtisë dhe Industrisë dhe për hapat e ndërmarrë në ngritjen e kapaciteteve në agjencitë, si në: Agjencinë e Metrologjisë, Agjencinë e Akreditimit dhe Agjencinë e Standardizimit, si dhe në Inspektoratin e Tregut të MTI-së.

Ministrja Bajrami e informoi Vermeulen rreth Projektit të Zhvillimit të Qendrës Turistike të Brezovicës. Ajo e siguroi Vermeulen se Qeveria e Republikës së Kosovës vazhdon të mbështesë projektin dhe të realizojë obligimet e qeverisë, që dalin nga kontrata e nënshkruar.

Ministrja e njoftoi atë edhe për Skemën e Garantimit të Kredive, ku do të lehtësohet qasja në financa për bizneset, duke siguruar garanci kolaterali deri në 50 për qind.

Ajo bëri të ditur se tashmë është finalizuar Draft-ligji për investime strategjike, i cili do të krijojë lehtësira dhe mundësi më të mira për investime si dhe do të mundësojë negocimin me investitorë strategjikë për të sjellë investime në Kosovë. /Telegrafi/