“Zotëri” Begzad Sinani prishi veturën, udhëton me kombibus

Prej se e ka shkatërruar veturën zyrtare në një aksident komunikacioni, kryetari i komunës së Kamenicës, Begzad Sinani, vështirë se mund ti ta quaj veten më zotëri, siç bënte deri më tani.

Atij tani po i duhet të udhëtoj me kombibus. Të mërkurën ai është parë të futet në mesin e 8 pasagjerëve për të udhëtuar nga Kamenica drejt fshatit Roganë, veprim këtë që nuk e kishte bërë para se ta prishte veturën e tij zyrtare, raporton Gazeta Fjala.

“Po shkojmë në mbledhje të Bordit Drejtorëve që këtë herë pak më ndryshe do të mbahet në shkollën fillore” Metush Krasniqi” në Roganë”, ka shkruar Faton Biqkaj, shef i personelit, poshtë fotografisë ku shihet edhe kryetari i komunës në mesin e drejtorëve të tij.
Sinani, kryetar i Kamenicës, është përfshirë në një aksident komunikacioni me veturën e tij zyrtare në magjistralen Prishtinë-Ferizaj, përkatësisht në Veternik, në hyrje të Prishtinës.

Policia e Kosovës ka konfirmuar se nuk ka pasur lëndime në njerëz, pos dëmeve materiale.

Ndërsa edhe Komuna e Kamenicës ka konfirmuar aksidentin. Faton Biqkaj, shef i personelit, ka thënë se Sinani kishte qenë në një udhëtim zyrtar me veturën e tipit “Skoda Octavia” dhe se dëmet i paguajnë varësisht se kush është fajtori pas procesit. /Telegrafi/