Serbët bllokojnë pikën kufitare në Jarinje

Dhjetëra serbë të veriut të Kosovës me automjetet e tyre kanë bllokuar të hënën rreth mesditës për 40 minuta pikën kufitare në Jarinje, duke penguar në këtë mënyrë qarkullimin në drejtim Kosovë-Serbi dhe anasjelltas, bëjnë të ditur burime të KosovaPress-it.

Sipas këtyre burimeve, shkak për këtë bllokadë të kufirit është aplikimi i caktimit të vlerës doganore për mallrat nga Serbia që po bëhet nga Prishtina, dhe jo siç ishte bërë deri tani në kufi.

“Tani vozitësit e kamionëve me mallra që hynë nga Serbia dhe që kanë destinacion veriun e Kosovës, po duhet të presin derisa doganierët po konsultohen me kolegët e tyre në Prishtinë për vlerën e doganës së mallit dhe në këtë mënyrë vozitësit po thonë se po paguajnë më shtrenjtë, por edhe po humbin kohë më shumë”, kanë thënë burimet.

Ata kanë kërkuar që të anulohet një praktikë e tillë e vlerësimit të mallit, në të kundërtën do ta bllokojnë kufirin e Jarinjës dhe të Bërnjakut tërësisht.

Bllokada ka zgjatur nga ora 12:45 deri rreth orës 13:30 dhe nuk është shënuar ndonjë incident.

Mësohet se protesta për bllokadë të kufirit të Jarinjës janë paralajmëruar edhe për nesër, nëse nuk ndryshon diçka në këtë drejtim. /KosovaPress/Telegrafi/