Ekspertët: Anëtarësimi në FMN dhe Bankën Botërore nuk do të jetë aq i lehtë

Anëtarësimi i Kosovës në Fondin Monetarë Ndërkombëtarë dhe Bankë Botërore sipas ekspertëve të ekonomisë vlerësohet si pozitive sepse kjo krijon mundësi më të mira për të pasur qasje në fonde ndërkombëtare. Por ata paralajmërojnë se anëtarësimi në FMN dhe Bankë Botërore nuk do të jetë edhe aq i lehtë, sepse paraprakisht Kosova duhet të plotësoje disa parakushte, të cilat mund ti sjelli disa vështirësi, vlerësojnë ekspert të ekonomisë.

Pranvera e viti 2009 është data kur Kosova pritet të anëtarësohet në dy institucione të rëndësishme financiare, si Fondi Monetarë Ndërkombëtare dhe Banka Botërore. Ekspertë vendorët të ekonomisë e vlerësojnë pozitivisht këtë akt duke pohuar se kjo i krijon Kosovës mundësi për të pasur qasje në fonde ndërkombëtare. Por, ata paralajmërojnë se anëtarësimi në FMN dhe Bankë Botërore nuk do të jetë edhe aq i lehtë për kosovarët.

Drejtoresha e Odës Ekonomike Amerikane, Mimoza Kusari numëron vështirësitë me të cilat do të ballafaqohet Kosova para anëtarësimit.

“Vështirësim i natyrave të ndryshme kryesisht do të kenë të bëjnë me mungesën e të dhënave nga pala kosovare mbi ciklet ekonomike dhe zhvillimet e dekadës së fundit, ose të një dekade më parë. Problemi tjetër është mungesa e shënimeve nga periudha kur në Kosovë ka ekzistuar sistemi paralel, por këtu me siguri do të merren parasysh fakte që kanë ekzistuar në atë kohë. Në anën tjetër Kosova do të ballafaqohet edhe më një kuotë të pagesës vjetore që do ta ketë për FMN”, sqaron znj., Kusari-Lila

Ndërsa sipas Safet Gërxhaliut, nga Oda Ekonomike e Kosovës, anëtarësimin në FMN dhe Bankë Botërore është më shumë një trumbetim i “suksesshëm” i institucioneve politike të Kosovës.

“Sa i përket anëtarësimit të Kosovës qoftë në FMN, qoftë në Bankën Botërore, ka më tepër konotacion të promovimit politik. Është vërtetë një rrugë që ka rëndësinë e vetë, mirëpo ajo nuk është një rrugë edhe aq e lehët sa mendohet dhe pasqyrohet. Dhe, në fund të fundit është mirë që të ballafaqohemi me problemin para se të bëjmë një pompozitet se çdo gjë është e kryere”, thotë Gërxhaliu.

Shpend Ahmeti, drejtor i Institutit për Studime të Avancuara GAP, vlerëson se anëtarësimi në këto dy institucione financiare ka edhe përparësitë nga të cilat Kosova do të përfitojë.

“Njerëzit këtu thonë se ne do të marrim edhe shumë fonde nga këto dy institucione, që nuk është edhe plotësisht e vërtetë. Shuma e fondeve të cilat ne mund t’i marrim nga këto institucioneve varet edhe nga fuqia jonë për t’i kthyer. Mirëpo, përparësia më e madhe vlerësohet se qëndron në këshillat që do t’i merrnim nga Banka Botërore dhe në sektorë të ndryshëm, ndërsa nga FMN në aspektin makroekonomik, e duhet të cekim se edhe investitorët të cilët vijën në Kosovë, zakonisht i marrin parasysh raportet e këtyre dy institucioneve për ekonominë e një vendi”, thotë Ahmeti.

Në kuadër të takimeve të vjeshtës, të Bankës Botërore dhe Fondit Monetar Ndërkombëtar që u mbajtën në Washington, për herë të parë ishte i ftuar në cilësinë e vëzhguesit edhe një delegacion i Republikës së Kosovës, i kryesuar nga ministri i Ekonomisë dhe i Financave, Ahmet Shala.

Kosova ka bërë kërkesën zyrtare për t’u anëtarësuar në këto organizata financiare ndërkombëtare dhe sipas ministrit Shala, anëtarësimi mund të bëhet qysh në pjesën e parë të vitit të ardhshëm. E gjithë procedura e anëtarësimit merr të paktën prej gjashtë deri në nëntë muaj, ndërkaq nga mesi i korrikut të dyja institucionet konfirmuan marrjen e aplikacionit nga Kosova.