Zelensky thotë se është duke punuar në një ‘plan gjithëpërfshirës’ për paqen në Ukrainë

Presidenti i Ukrainës, Volodymyr Zelensky, thotë se po punon për një “plan gjithëpërfshirës” për mënyrën se si Kievi e sheh përfundimin e luftës me Rusinë.

Duke folur për gazetarët në Kiev së bashku me presidenten e Sllovenisë, Natasha Pirc Musar, ai tha: “Ne nuk duam ta zgjasim këtë luftë”.

“Ne duhet të arrijmë në një paqe të drejtë sa më shpejt që të jetë e mundur. Ne kemi biseduar për situatën në fushën e betejës, veçanërisht në rajonin e Kharkivit ku Rusia u përpoq të fillonte një ofensivë në shkallë të gjerë. Pushtuesit nuk e arritën këtë. Forcat tona ukrainase e kanë stabilizuar situatën dhe e kanë ndalur ofensivën, e cila ishte e vështirë. Ne do të vazhdojmë të bëjmë të njëjtën gjë për të zhveshur Rusinë nga iluzioni se mund të arrijë diçka me këtë luftë”, citohet të ketë thënë ai, përcjell Telegrafi.

Fokusi i takimit të Zelenskyt me Pirc Musar ishte diskutimi i përgatitjeve për një samit të dytë ndërkombëtar të paqes, pas një ngjarje dy-ditore në fillim të këtij muaji në Zvicër.

“Jam shumë i lumtur për përparimin në konferencën e parë paqeruajtëse në Zvicër. Dhe ne ramë dakord se nuk ka asnjë politikan në Evropë që nuk dëshiron paqe. Të gjithë i kuptojmë rreziqet. Por Ukraina është ajo që duhet të vendosë kur dhe nën çfarë kushtesh do të negociojë…”, tha ajo.

Ndryshe, aktualisht nuk ka një mekanizëm zyrtar negociues të drejtpërdrejtë midis Zelenksyt dhe homologut të tij rus, Vladimir Putin, por Ukraina ka thënë në mënyrë të përsëritur se Rusia duhet të tërheqë të gjitha forcat e saj nga brenda kufirit të saj, duke përfshirë nga Gadishulli i Krimesë të cilin e aneksoi në 2014, përpara se të mund të fillohen bisedime serioze për paqen.

Por trupat ruse po bëjnë disa përfitime territoriale në fushën e betejës dhe Zelensky shpesh është ankuar për furnizimin e ngadaltë të armëve dhe municioneve nga aleatët perëndimorë.

Zelensky u bëri thirrje udhëheqësve të Bashkimit Evropian të enjten që të përmbushin premtimet e tyre për të ofruar pajisje ushtarake për vendin e tij, ndërsa blloku premtoi mbështetje afatgjatë për Kievin.

Duke folur në një Samit të Këshillit të BE-së në Bruksel të enjten, Zelensky tha se do të paraqiste një “plan të detajuar” për t’i dhënë fund luftës në muaj.

“Të gjithë ata që duan vërtet paqen duhet të punojnë së bashku për të zhvilluar një plan veprimi për të adresuar të gjitha aspektet e sigurisë që janë shkelur nga Rusia”, u tha ai gazetarëve në Kiev të premten. /Telegrafi/