Zelensky shkarkon të gjithë shefat rajonalë të rekrutimit ushtarak

Presidenti ukrainas Volodymyr Zelensky njoftoi të premten shkarkimin e krerëve të të gjitha qendrave rajonale të rekrutimit ushtarak të vendit, mes shqetësimeve për korrupsionin.

Sipas mediave të huaja, përcjell Telegrafi, Zelensky tha se një rishikim i qendrave të rekrutimit të Ukrainës zbuloi shenja të abuzimit profesional, duke filluar nga pasurimi i paligjshëm deri te transportimi i burrave të kualifikuar për rekrutim përtej kufirit, pavarësisht një ndalimi gjatë luftës.

“Ky sistem duhet të drejtohet nga njerëz që e dinë saktësisht se çfarë është lufta dhe pse ryshfeti gjatë luftës është tradhti”, citohet të ketë thënë ai në një deklaratë.

Lexo po ashtu Ministri ukrainas i Mbrojtjes konfirmon rrethimin e rusëve në Bakhmut, dhe marrjen e kontrollit në lartësitë strategjike

Kievi e ka bërë goditjen e ryshfetit një prioritet kyç, pasi kjo do të ndihmonte në ndalimin e pushtimit nga Rusia dhe është gjë që kërkohet për anëtarësimin në Bashkimin Evropian.

Siç vënë në pah mediat, Zelensky tha se gjenerali i lartë Valery Zaluzhny do të jetë përgjegjës për zbatimin e vendimit dhe se kandidatët e rinj për postet do të verifikohen fillimisht nga shërbimi i sigurisë së brendshme të Ukrainës, SBU.

Ukraina është përballur me sfida rekrutimi ndërsa lufta me Rusinë i afrohet 18 muajve dhe ushtria goditet herë pas here nga skandale që zbulojnë korrupsion ose taktika të dyshimta rekrutimi. /Telegrafi/