Zbulohet arsyeja e sulmit me fishekzjarrë të tifozëve kroatë

Tifozët kroatë sot hodhën fishekzjarrë gjatë ndeshjes së përfaqësueses së tyre ndaj Çekisë, por mediet raportojnë se ata patën një arsye për këtë reagim.

Mediumet britanike raportojnë se hedhja e fishekzjarrëve nga tifozët ka ardhur si formë proteste kundër Federatës së Futbollit të Kroacisë.

Tifozët hodhën fishekzjarrë në fushë derisa Kroacia po fitonte me rezultat 2 me 1 dhe gjatë largimit të fishekzjarrëve u sulmua edhe një kujdestar i fushës.

Këto sulme kanë ndodhur si protestë kundër Federatës dhe veçanërisht kundër Zdravko Mamiqit, ish-drejtor ekzekutiv i Dinamo Zagrebit.

Fansat kroatë kanë një betejë të gjatë me Mamiqin, i cili u arrestua gjatë muajit nëntor të vitit të kaluar pasi ishte përfshirë një parregullsi në transferime të lojtarëve te Dinamo.

Mamiq është akuzuar për përvetësimin e 118 milionë kunave (14 milionë eurove) nga Dinamo që prej vitit 2008, derisa ai dhe vëllai i tij u arrestuan korrikun e kaluar kur u akuzuan për shmangie të taksave lidhur me transferimin e Luka Modriqit nga Dinamo te Tottenhami në vitin 2008 dhe në transferimin e Dejan Lovrenit te Lyoni në vitin 2010.

Fansat ia kishin mësyrë që të marrin masa anti-korrupsion duke protestuar në ligë dhe në kualifikimet e Euro 2016, para se të ndodhte sulmi i sotëm.