Zbulohen çmimet marramendëse të biletave për finalen e Ligës së Kampionëve

UEFA ka zbuluar çmimet zyrtare të biletave për finalen e këtij sezoni të Ligës së Kampionëve, që do të zhvillohet ne ‘Wembley’ të Anglisë.

Çmimet e biletave për tri finalet e meshkujve në garat e UEFA-s dhe për Superkupën e UEFA-s, janë publikuar nga organi drejtues i futbollit të enjten. Në një njoftim në uebfaqen e tyre zyrtare, UEFA ka konfirmuar se tifozët e ekipeve pjesëmarrëse dhe publiku i përgjithshëm, mund të blejnë “shumicën e biletave”.

Për finalen e Ligës së Kampionëve që do të zhvillohet në ‘Wembley’ më datë 1 qershor, për shembull, tifozët dhe publiku i përgjithshëm mund të jenë në gjendje të marrin 60 mijë nga 86 mijë bileta në dispozicion.

Biletat tjera të mbetura do t’i takojnë strukturave organizative lokale, shoqatave kombëtare të UEFA-s, partnerëve tregtarë, transmetuesve dhe UEFA-s.

Njësoj si në vitet paraprake, tiketat e publikut të përgjithshëm nuk do të shiten menjëherë, por njëherë do të shiten përmes një lotarie e cila do të organizohet pas përfundimit të aplikimit për bileta.

Lexo po ashtu Pavarësisht se përfundon jashtë top pesëshes: Man United mund të luajë në Ligën e Kampionëve sezonin e ri

Por, sa do të kushtojnë këto bileta? Dy ekipet që arrijnë finalen do të marrin secila nga 25 mijë bileta, ndërsa biletat tjera të mbetura do t’i ofrohen për shitje tifozëve anembanë botës në uebfaqen zyrtare të UEFA-s.

Biletat më të lira variojnë deri në 60 euro aty ku përfshihen edhe kategoritë e personave me aftësi të kufizuara.

Ndërkohë biletat tjera ndahen varësisht nga kategoria. Çmimet e kategorisë 3 sillen rreth 160 euro, ato të kategorisë 2 rreth 430 euro ndërsa ato të kategorisë së parë janë gjithashtu në dispozicion në vlerë prej 610 eurosh.

Bileta më e shtrenjtë ndërkohë në zonën VIP, kushton rreth 2 mijë e 900 euro./Telegrafi/