Xhemi: S’kam asnjë arsye për të mos i folur Enedës

Të dielën e kaluar, Xhemi Shehu është rikthyer, pas shumë vitesh, në drejtimin e spektaklit të humorit “Portokalli”, ndërsa  ajo doli në ekran pas një kohe shumë të shkurtër nga lindja e djalit të dytë, Gabriel, duke i lënë të gjithë pa fjalë me formën e shkëlqyer fizike.

“Fakti që u ktheva në formën e mëparshme fizike, më dha dorë për rikthimin tim në punë, të cilin do ta quaja disi të parakohshëm. Dy fëmijë të vegjël, edhe pse me ndihmë nga gjyshet, mbeten sërish një lodhje e madhe dhe stërmundim. Mamatë që e kanë provuar më kuptojnë më mirë se për çfarë e kam fjalën”, ka deklaruar ajo për Bluetooth.

Prezantuesja e njohur i ka komentuar edhe thashethemet për një marrëdhënie jo të mirë me kolegen Eneda Tarifa. Madje ka nga ata që thonë se dy prezantueset nuk flasin me njëra-tjetrën.

“Nuk kemi pasur kurrë zënka, ndaj s’e di ku bazohen këto gojët e liga. S’kam asnjë arsye për të mos i folur Enedës. Unë kam një jetë që e ndaj skenën me të tjerë, e madje, sinqerisht ju them se mërzitem kur jam vetëm në të”, ka sqaruar Xhemi. /Telegrafi/