Vullnetarët e huaj që duan t’i bashkohen ushtrisë ukrainase duhet ta kalojnë testin e poligrafit

Të huajt dhe personat pa shtetësi që dëshirojnë të shërbejnë në Forcat e Armatosura të Ukrainës, Shërbimin Shtetëror të Transportit Special dhe Gardën Kombëtare do t’i nënshtrohen testimit psikofiziologjik.

Këshilli i Ministrave ka miratuar rregulloren më të fundit të sigurisë të hartuar nga Ministria e Mbrojtjes, e cila parashikon përdorimin e testimit me poligraf.

“Testimi psikofiziologjik me përdorimin e poligrafit do të kryhet nga Qendra e sapoformuar për rekrutimin e të huajve dhe personave pa shtetësi, me përfshirjen e ekspertëve nga Ministria e Mbrojtjes dhe Garda Kombëtare. Studimi do të kryhet në gjuhën që flet kandidati”, thuhet në deklaratë.

Sipas njoftimit, kontrolli psikofiziologjik me poligraf do të jetë i detyrueshëm për kandidatët për pozita oficerësh dhe për ato që kanë qasje në sekrete shtetërore.

Kandidatët që kanë dhënë informacione të dyshimta për veten e tyre gjithashtu do të duhet t’i nënshtrohen testimit me poligraf.

Përveç kësaj, personeli ushtarak i huaj aktiv mund t’i nënshtrohet një kontrolli të tillë me iniciativën e Shërbimit të Sigurisë së Ukrainës ose të komandës së njësisë. /Telegrafi/