Vrau gruan që i ngjante asaj për të inskenuar vdekjen e vet – fillon procesi gjyqësor ndaj gjermanes

Sot gjykata në Gjermani ka filluar procesin gjyqësor ndaj një gruaje të akuzuar për vrasjen e një gruaje tjetër që i ngjante asaj për të inskenuar vdekjen e saj, në një çështje që në Gjermani është bërë e njohur si “vrasja e dyfishtë”.

Siç raporton BBC, Sharaban K. (24) dhe 25-vjeçari dyshohet se kanë zgjedhur viktimën në bazë të pamjes dhe moshës së saj, transmeton Telegrafi.

Prokurorët thonë se pas vrasjes planifikonin të fshiheshin dhe të fillojnë jetën e re, por se janë kapur të nesërmen. Ajo dhe i bashkëpjesëmarrësi në krim po mohojnë akuzat e ngritura ndaj tyre.

Sipas dokumenteve të gjykatës, Sharaban K me shtetësi gjermano-irakiane në kohën e vrasjes në vitin 2022 kishte 23-vjet, kurse në Instagram kërkonte gratë që i ngjanin dhe tentonte t’i njofton duke u bërë premtime të ndryshme.

Prokurorët thonë se viktimës 23-vjeçe me prejardhje algjeriane e identifikuar si Khadidja O, i është premtuar trajtim kozmetik falas në një sallon ondulomi.

Atë e kishin marrë në qytetin Eppingen në jug të Gjermanisë, e më pas e kishin dërguar në Ingolstadt të Bavarisë.

Prokurorët gjithashtu thonë se viktima ishte therur 56 herë dhe është goditur në kokë para se trupi i saj të lihej në një zonë malore brenda një Mercedesi të zi.

Kur trupi i saj u gjet, fillimisht është menduar se Sharaban K ka vdekur. Megjithatë, ajo dhe 25-vjeçari Sheqir K u arrestuan të nesërmen pasi që u panë në një piceri.

Familja e Sharaban K, është nga komuniteti Yazidi në veri të Irakut, kurse mediat gjermane raportojnë se martesa e saj e dështuar mund të ketë motivuar atë të inskenojë vdekjen e saj.

Pas një hetimeve, përfshirë intervistat me dëshmitarët dhe transkriptet e bisedave, policia ngriti akuza të tjera kundër çiftit.

Të dy dyshohen gjithashtu se kanë punësuar një vrasës me pagesë për të vrarë vëllain e ish-partnerit të saj.

Mirëpo, vrasësi i dyshuar, i cili ka marrë një shumë prej 5000 eurosh, nuk e ka kryer vrasjen. Përveç kësaj, gjatë qëndrimit në paraburgim, i dyshuari dyshohet se ka tentuar ta bindë të burgosurin që të vrasë dëshmitarët në këtë rast.

Në ditën e parë të gjykimit të martën, procedurat u zvarritën ndjeshëm. Avokatët mbrojtës argumentuan se një gjykim i drejtë nuk ishte i mundur për shkak se prokurorët kishin dorëzuar së fundi dokumente shtesë, që kërkonin kohë shtesë për shqyrtimin e mbrojtjes dhe ata kërkuan pezullimin e procedurës.

Prokurorët e hodhën poshtë këtë argument, duke thënë se nuk ishte e pazakontë që dokumentet shtesë të dorëzoheshin pas një aktakuze. Gjykata duhet të vendosë javën e ardhshme nëse do të pezullojë procedurat. /Telegrafi/