Uji në Shtime, të vlohet para se të pihet

Fillon prodhimin Fabrika e ujit në Komunën e Shtimes, por uji para se të pihet duhet të vlohet për shkak të sigurisë.

Zyrtarët e Kompanisë së Ujësjellësit Rajonal ”Prishtina”, akne thënë se janë duke e përcjellë me shqetësim dhe vëmendje të shtuar situatën e krijuar së fundmi në Komunën e Shtimes si zonë e shërbimit.
“Pas vërshimeve nga reshjet e dendura atmosferike, u ofroi qytetarëve mbështetje dhe përkrahje maksimale duke i mobilizuar të gjitha ekipet e mirëmbajtjes së rrjetit të ujësjellësit dhe kanalizimit në Njësinë Operative të Ujësjellësit në këtë Komunë”, thekson komunikata e kësaj kompanie.

Për shkak të ruajtjes nga rreziku i mundshëm të personelit të kompanisë dhe stabilimenteve elektromakinerike në stacionin e pompave dhe rezervuarin kryesor të qytetit, gjatë ditës së djeshme u detyruam të ndërprejmë prodhimin e uji, respektivisht furnizimin me ujë për të gjithë konsumatorët e Komunës së Shtimes, thuhet në njoftim.

“Pasi që sot ka filluar të bjerë niveli i ujërave sipërfaqësore atmosferike në afërsi të fabrikës së përpunimit të ujit dhe stacionit të pompave, duke filluar nga ora 11:00 do futet në funksion prodhimi i ujit për të gjithë konsumatorët e kësaj komune, me ç’rast furnizimi me ujë do t’i kthehet normalitetit”. /Telegrafi/