Sulmi ukrainas ndaj luftanijes “Olenegorsky Gornyak”, çfarë do të thotë kjo për rusët?

Sulmi i Ukrainës ndaj luftanijes ruse “Olenegorsky Gornyak” në Detin e Zi shënon zhvillimin më të madh të sotëm të luftës.

Ukraina shpesh nuk deklarohet për sulmet si këto, por këtë herë konfirmimi erdhi brenda disa orësh, raporton Sky News, transmeton Telegrafi.

Një burim i inteligjencës ukrainase i tha agjencisë Reuters se droni detar mbante 450 kg TNT kur goditi anijen, e cila kishte në bord 100 ushtarakë rusë në atë kohë.

Burimi shtoi se “si rezultat i sulmit, ‘Olenegorsky Gornyak’ mori një çarje serioze dhe aktualisht nuk mund të kryejë misionet e tij luftarake”.

Anija dukej se kishte rrjedhur vaj nga njëra anë.

Por sa i dëmshëm ka qenë ky sulm për flotën ruse të Detit të Zi?

Ndoshta efekti kryesor është ai psikologjik.

Ndoshta efekti kryesor është ai psikologjik. Është sulmi më i largët në territoret ruse në kufi me Detin e Zi që ka kryer Ukraina.

Është një shenjë se Ukraina është në gjendje dhe e gatshme të vë në cak portet tregtare të Rusisë.

Këtu ka gjithashtu një nivel simbolizmi. Ishte një nga gjashtë anijet luftarake që u përdorën në stërvitje disa ditë përpara se Rusia të niste pushtimin e saj në shkallë të plotë.

Rusia e zhvendosi anijen nga Mesdheu, përmes ngushticës së ngushtë të Bosforit të Stambollit, dhe në Detin e Zi për stërvitje në fillim të shkurtit 2022. Anija që atëherë ka mbetur në Detin e Zi.

Por ndonëse ky sulm është i dukshëm, është e rëndësishme të mbani mend se kjo është vetëm një anije – dhe Rusia ka shumë të tjera.

“Olenegorsky Gornyak” është një anije zbarkimi e klasit “Ropucha”, një kategori e ndërtuar në Poloni për Marinën e atëhershme Sovjetike midis viteve 1970 dhe fillimit të viteve 1990. Kjo anije e veçantë është ndërtuar në vitin 1976.

Ukraina dikur kishte një anije të së njëjtës klasë, por thuhet se u kap nga trupat ruse gjatë aneksimit të Krimesë në vitin 2014.

Anija 112 metra e gjatë dhe 15 metra e gjerë, Olenegorsky Gornyak është një anije amfibe e projektuar për zbarkim në plazh – por nuk është përdorur për këtë qëllim gjatë 18 muajve të saj në Detin e Zi.

Siç raporton Sky News, anija mund të transportojë deri në 500 ton pajisje dhe ngarkesë, dhe është e armatosur me dy topa detarë, dy raketahedhës të shumëfishtë dhe katër raketa-hedhës portative kundërajrore. /Telegrafi/