Spasovski: Të gjitha opsionet janë të hapura (Video)

Numri i votuesve të cilët duhet të kontrollohen derë më derë shkaktoi mosmarrëveshje ndërmjet anëtarëve të KSHZ-së. Këtë për TV21 e konfirmuan burime prej LSDM-së. Prej kësaj partie i demantuan informatat se i tërheqin anëtarët e tyre prej KSHZ-së. Por, sot prej Strumicës, Ministri i Punëve të Brendshme, Oliver Spasovski, tha se të gjitha opsionet mbeten të hapura.

“Të gjitha opsionet janë të hapura me qëllim që ta mbrojmë procesin e zgjedhjeve. KSHZ-ja le ta pastrojë Listën zgjedhore, që të jemi të sigurt se numri është real dhe se është numër i cili nuk do të mund të keqpërdoret dhe të jetë edhe një mundësi tjetër për mashtrime dhe falsifikime në zgjedhje në R.M”, u shpreh Oliver Spasovski, Ministër i Punëve të Brendshme.

Prej partisë më të madhe opozitare nuk mohojnë në punën e mbrëmshme të seancës së KSHZ-së pengesë kanë qenë votuesit e kontestueshëm. Prej partisë në pushtet, përmes një kumtese thonë se gjatë ditës së djeshme LSDM-ja ka bërë terror mbi KSHZ-në, duke i përdorur të gjitha mjetet dhe manipulimet, duke tentuar që, siç thonë, të krijohet një numër më i madh i qytetarëve që do të jenë lëndë për kontroll në mënyrë që ndonjëri prej tyre të tregohet si votues fantom – thuhet në kumtesën e VMRO-DPMNE-së. LSDM-ja, siç qëndron në kumtesën e partisë në pushtet, me muaj po paraqet pasqyrë të rrejshme në opinion se ka pasur numër të madh të të ashtuquajturve votues fantom. Votues fantom as s’ka pasur, e as që do të ketë, thuhet në kumtesën e VMRO-së.

Ish-anëtari i KSHZ-së, Aleksandër Dashtevski, thotë se KSHZ-ja nuk duhet t’i përmbush agjendat politike të dikujt, por duhet t’i realizojë zgjedhjet. Ai këshillon që anëtarët e KSHZ-së në një afat të shkurtër të mblidhen dhe të dalin para opinionit me listë të pastruar.

“Nga ajo që e dëgjojmë nëpër media, nuk ekzistojnë të ashtuquajturit votues fiktiv”, tha Aleksandar Dashtevski, Ish – Anëtar i KSHZ.

Dashtevski i quajti manipulime numrat e të ashtuquajturve votues fantom dhe sipas tij, bëhet fjalë për vetëm 30 mijë votues për të cilët thotë se jetojnë jashtë shtetit dhe se do të votojnë atje ku jetojnë. Ai konsideron se KSHZ-ja nuk duhet të jetë ngatërresë e re në krizën politike që tanimë ekziston.

“Për atë që e kanë lënë seancën, unë besoj se nuk do të zgjasë dhe siç dëgjuam prej partive më të mëdha shqiptare, ata nuk kanë pasur mbështetje dhe kjo është shumë me rëndësi”, shtoi Dashtevski.

Dashtevski thotë se anëtarët e LSDM-së duhet të realizojnë zgjedhje dhe jo agjenda partiake. Përndryshe sipas LSDM-së duhet të kontrollohen mbi 200 mijë votues, ndërsa për VMRO-DPMNE-në janë të kontestueshme vetëm rreth 75 mijë të dhëna prej listës zgjedhore./Telegrafi/