Shpallet gjendje e jashtëzakonshme në Skenderaj pas vërshimeve

Komuna e Skenderajt ka shpallur gjendje të jashtëzakonshme pas situatës së rënduar nga vërshimet.

Kryetari i kësaj komune, Fadil Nura, ka njoftuar gjithashtu se ka formuar Shtabin Emergjent, i cili tashmë ndodhet në terren.

Lexo po ashtu Gjendje e rënduar në Skenderaj nga vërshimet, rrugë e lokale të bllokuara

“Si rrjedhojë e reshjeve të pandërprera, nga e cila gjendje është rënduar situata në përgjithësi, si dhe në bazë të kompetencave dhe autorizimeve, kam marrë vendim që të shpallim gjendje të jashtëzakonshme në gjithë territorin e komunës sonë”.

“Kam formuar gjithashtu Shtabin Emergjent, i cili tashmë ndodhet në teren dhe po e bën punën e vet”, ka shkruar Nura në Facebook.

Ai tutje ka thënë se që nga orët e mëngjesit, secila drejtori me njësitë dhe shërbimet vartëse, ndërkohë që edhe me mbështetje të Shërbimit të Zjarrfikësve, është angazhuar të bëjë maksimumin e punës që situata të jetë nën kontroll, me gjithë vështirësitë dhe kapacitetet ekzistuese karshi sasisë së madhe të ujit nga reshjet e shiut.

“Në disa fshatra gjendja është jo e mirë, ndërkohë që ekipet dhe shërbimet komunale me makinerinë e punës po i trajtojnë me kujdes telashet e shkaktuara”, ka përfunduar i pari i Skenderajt.