Shoqatat e dala nga lufta e UÇK-së: Dënojmë lojën me ndjenjat e sinqerta të qytetarëve

Shoqatat e dala nga lufta e UÇK-së deklarohen se e kanë mbështetur protestën e sotme, duke e konsideruar si një protestë për të mirën e përgjithshme dhe duke besuar në sinqeritetin e organizatorëve.

“Mbrojtja e pasurive të Kosovës si dhe dënimi i deklaratave shoveniste nga ana e një ministri serb të Qeverisë së Kosovës, ishin qëllimet për të marrë pjesë në protestën e sotme. Kështu besojmë se edhe qytetarët që morën pjesë, kishin sinqeritetin më të madh për protestë dinjitoze, e assesi prirjen për dhunë të panevojshme”, thuhet në reagimin e tyre.

Organizata e Veteranëve të Luftës së UÇK-së, Shoqata e Invalidëve të Luftës së UÇK-së dhe Shoqata e Familjeve të Dëshmorëve të UÇK-së deklarohen se e dënojnë politizimin e protestës e cila do të duhej të ishte gjithëpopullore, si sulmet që u bënë ndaj policisë dhe ndërtesës së Qeverisë.

“Dënojmë ashpër të gjithë ata që tensionuan situatën, që luajtën me ndjenjat e sinqerta të qytetarëve, duke e shndërruar protestën në të kundërtën e qëllimit të saj. Përderisa qytetarët u tubuan për mbrojtjen e pasurive të Kosovës, kahja politike dhe huliganiste që iu dha protestës, prodhoi të kundërtën: u demoluan ndërtesat e institucioneve të Kosovës dhe objektet afariste, si dhe u lënduan ata që kujdesen për sigurinë tonë”, thuhet në reagim.

Shoqatat e dala nga Lufta e UÇK-së deklarohen se do të përkrahin të gjitha protestat paqësore për të mirën e përgjithshme, e assesi protestat vandaliste ku dëmtohen pronat publike dhe të qytetarëve.