Shefi i Moderna parashikon se vaksinat aktuale “nuk do të jenë të mjaftueshme” për të luftuar variantin Omicron

Kreu i Moderna paralajmëroi sot se do të duhen muaj për të zhvilluar një vaksinë kundër Omicron.

Stephane Bancel, i cili drejton prodhuesin e vaksinës, tha se u duheshin edhe dy javë të tjera që shkencëtarët të përcaktojnë se sa efektive janë vaksinat aktuale kundër variantit, por se shenjat e hershme nuk janë inkurajuese, përcjell Telegrafi.

Shefi ekzekutiv tha se ata ishin veçanërisht të shqetësuar nga 32 mutacione në proteinën S – të cilën virusi e përdor për të pushtuar qelizat – të cilat ka të ngjarë të çojnë në një ‘rënie materiale’ në efektivitetin e injektimit.

Zoti Bancel i tha Financial Times: “Të gjithë shkencëtarët me të cilët kam biseduar… janë sikur “kjo nuk do të jetë mirë”.

Ekspertët paralajmërojnë se ka të ngjarë që vaksinat të jenë më pak efektive në parandalimin e infeksioneve me Omicron, por ata duhet të jenë ende në gjendje të parandalojnë shtrimet në spital dhe vdekjet në shumicën e rasteve.

Lexo po ashtu Si krahasohet Omicron me variantet e tjera të COVID-19?

Ekziston gjithashtu frika se varianti mund të jetë më i aftë të infektojë ata që morën dozën e dytë më shumë se gjashtë muaj më parë, pasi studimet treguan se nivelet e antitrupave ranë me 80 për qind gjatë kësaj periudhe.

Ndryshe, i fundit në Evropë ka qenë një spital në Spanjë ka njoftuar rastin e parë të zbuluar në vend të variantit Omicron.

Më herët Portugalia tha se kishte zbuluar rastet e saj të para të variantit Omicron.

Veç këtyre, edhe shumë vende të tjera evropiane, përfshirë Britaninë e Madhe, Danimarkën, Holandën, Gjermaninë, Republikën Çeke, Italinë dhe Belgjikën kanë njoftuar tani se kanë zbuluar raste të llojit të ri të coronavirusit.

Ndërsa ministri francez i Shëndetësisë, Olivier Veran tha se, ndërsa vendi i tij nuk kishte ende raste të konfirmuara, “ka të ngjarë që aktualisht të ketë raste në qarkullim”.

Duke folur në një konferencë për shtyp të dielën, presidentja e Komisionit Evropian Ursula von der Leyen tha se një “garë kundër kohës” ishte duke u zhvilluar për të trajtuar variantin Omicron.

Varianti i ri paraqet një rrezik global “shumë të lartë”, tha Organizata Botërore e Shëndetësisë në një përmbledhje teknike se si të përgatiteni për Omicron. /Telegrafi/