Rritje e lindjeve të parakohshme këtë vit në Ukrainë

Numri i lindjeve të parakohshme ose me komplikime është dyfishuar afërsisht këtë vit në krahasim me herët e mëparshme në Ukrainë, sipas zyrtarëve të spitalit.

Rritja e lindjeve të parakohshme thuhet se po ndodh për shkak të stresit dhe përkeqësimin e shpejtë të standardit të jetesës, gjë që po dëmton gratë shtatzëna, transmeton Telegrafi.

Derisa forcat ruse vazhdojnë me ofensivën e tyre përgjatë krahut lindor të Ukrainës, një mjeke ukrainase ka përshkruar se si ajo tani jeton në të vetmin maternitet të mbetur në rajonin e shkatërruar nga lufta në Donetsk për t’u kujdesur për foshnjat e lindura para kohe.

Para pushtimit të vendit nga Rusia, tre spitale në zonat e kontrolluara nga qeveria të rajonit të Donetsk kishin objekte për t’u kujdesur për foshnjat e lindura para kohe.

Megjithatë, njëri u godit nga një sulm ajror rus dhe tjetri u detyrua të mbyllej si rezultat i luftimeve – duke lënë në funksion vetëm maternitetin në qytetin e minierave të qymyrit Pokrovsk.

Tetiana Myroshnychenko, e vetmja neonatologe e mbetur në zonë, ka përshkruar se si jeton tani në spital dhe djali i saj trevjeçar e ndan javën mes qëndrimit në institucion dhe me babanë në shtëpi.

Mjekja shpjegoi se foshnjat në repartin e inkubacionit mbi tokë të spitalit nuk mund të shkëputeshin nga makineritë e tyre shpëtimtare dhe se largimi nga spitali, edhe nëse do të binte një sirenë sulmi ajror, do të ishte e pamundur.

Midis pacientëve të Myroshnychenkos është Veronica dymuajshe, e cila ka lindur para kohe.

“Nëse e çoj Veronikën në strehë, kjo do të zgjasë pesë minuta. Por për të, ato pesë minuta mund të jenë kritike”, tha Myroshnychenko. /Telegrafi/