Rritet FSK-ja

Forca e Sigurisë së Kosovës shënoi dyvjetorin e themelimit, ndërsa për herë të parë pjesëtarët e saj ishin rreshtuar të armatosur me armë të reja sipas standardeve të NATO-s, për nder të ditëlindjes. Edhe pse ende nuk i ka arritur kapacitetet e duhura të funksionalizimit, kjo forcë ka shënuar progres të dukshëm në shumë drejtime.

Në janar të 2009-ës, nisi veprimtarinë e saj një forcë e re e krijuar në bazat e një “ushtrie” demokratike dhe profesionale. Një forcë e hapur dhe e barabartë për të gjithë të interesuarit që dëshironin të bëhen pjesëtarë të këtij institucioni. Pa dyshim ishte ndjenjë e mirë të shohësh uniformën ushtarake të Kosovës të angazhuar në gjithë territorin e Kosovës duke shërbyer me plot përgjegjësi. Dyvjetori, FSK-në e gjen të pavarur dhe krejtësisht apolitike, e gjen multietnike dhe demokratike.

FSK e monitoruar nga KFOR-i, padyshim që është duke bërë përparim në profesionalizimin në raste të fatkeqësive natyrore dhe detyrave të tjera sfiduese. Gjatë vitit që lamë pas, Njësiti për Kërkim-Shpëtim i FSK-së udhëtoi për në Shkodër të Shqipërisë për të shpëtuar jetë njerëzish nga përmbytjet e ujit. Këta pjesëtarë, vërtet kanë arritur dy objektiva në këtë mision: ata shpëtuan jetën e shumë njerëzve që duhej të evakuoheshin. Por, ata gjithashtu kanë vepruar si ambasadorë të vërtetë të Kosovës, duke treguar angazhimin, disiplinën dhe profesionalizmin.

Ministria e Forcës së Sigurisë së Kosovës, tashmë ka nënshkruar marrëveshje bashkëpunimi me të gjitha vendet fqinje, përveç me Serbinë. Ndërkaq, janë në draftim e sipër edhe marrëveshje të tjera me vendet e BE-së dhe të rajonit. Nuk duhet harruar asnjëherë ndihma e shumë shteteve të huaja dhënë FSK-së me qëllim të forcimit.

21 janari tashmë quhet edhe “Dita e Hapur”, tradicionalisht e shpallur si ditë në të cilën të gjithë qytetarët e Kosovës kanë mundësi të vizitojnë repartet e FSK-së në të gjitha kazermat e Kosovës për t’u njohur me punën dhe aktivitetin e kësaj force. FSK aktualisht ka 2 147 pjesëtarë aktivë, ndërsa është në fazën e rekrutimit të pjesës rezervë.

Pavarësisht përparimeve që janë bërë në këtë drejtim, FSK ka disa mangësi. E para është mungesa e ligjit për pensionimin e pjesëtarëve të FSK-së dhe mosrealizimi i tërësishëm i buxhetit.

Struktura udhëheqëse e FSK-së duhet të punojë me përkushtim së bashku me të gjithë oficerët, dhe të gjithë partnerët vendorë e ndërkombëtarë që brenda afateve të përcaktuara të arrihen Kapacitetet e Plota Operacionale, si një forcë operacionale, e bashkuar, e vetëqëndrueshme, fleksibile dhe profesionale, e cila do të jetë e aftë t’i realizojë detyrat e saj brenda dhe jashtë vendit.