Reagimi i Vetëvendosjes për Aktgjykimin e Kushtetueses: Kurtit nuk i mohohet kandidatura për deputet

Lëvizja Vetëvendosje ka reaguar për herë të parë në faqen e saj zyrtare në Facebook pas shpalljes së Aktgjykimit të plotë nga Gjykata Kushtetuese.

Kjo parti ka thënë se Kurtit nuk i mohohet dhe as nuk ka ndonjë pengesë që ai të jetë kandidat për deputet apo kryeministër.

Vetëvendosje ka paralajmëruar se shumë shpejt do të mblidhet Këshilli drejtues i partisë dhe do të bëhet nominimi i Kurtit si kandidatë për kryeministër.

Reagimi i plotë:

Gjykatës iu jemi drejtuar për paligjshmërinë e Qeverisë dhe mandatin e Etem Arifit si i dënuar me burgim. Gjykata i konfirmoi në plotni pretendimet tona. Qeveria Hoti ishte e paligjshme. Mandati i të dënuarit me burgim ishte i paligjshëm. Kryetarit të Lëvizjes VETËVENDOSJE! nuk i mohohet dhe as nuk ka ndonjë pengesë që ai të jetë kandidat për deputet apo kryeministër. Shumë shpejtë Këshilli i Përgjithshëm do të mblidhet e kandidatura do të shpallet. 14 shkurti do të jetë ditë kremte sepse atë ditë përfundon politika e vjetër dhe qeverisja e keqe, e fillon ajo për të cilën qytetarët tashmë e kanë ndarë mendjen, dhe atë me referendum popullor.