Rahovec, lirohen shumë kategori nga pagesa e taksave të shërbimit civil

Me aprovimin e Rregullores për taksa, tarifa, ngarkesa dhe gjoba, e aprovuar nga kuvendi komunal, në komunën e Rahovecit janë liruar një numër i madh i kategorive të qytetarëve nga pagesa e taksës të shërbimit civil.

Sipas kësaj Rregullore, me dispozitë të veçantë, subjektet e liruara nga pagesa e taksës të shërbimit civil janë rastet sociale, ku duhet ofruar dëshmia nga Qendra për Punë Sociale, familjet e dëshmorëve, ku përfshihen prindërit, bashkëshortja ose bashkëshorti dhe fëmijët deri 18 vjeç, invalidët e luftës të shkallës së parë dhe atë të dytë, familjet e dëshmorëve të luftës, personat e hendikepuar, veteranët e luftës së UÇK-së, pensionistët, studentët dhe ish të burgosurit politik.

Lidhur me këtë, drejtori i Drejtorisë për Administratë të Përgjithshme në Komunën e Rahovecit, Sali Sallteku, thotë se lirimi nga pagesa është mirëpritur edhe nga ana e qytetarëve , të cilët e konsiderojnë si ndihmë lirimin e pagesave për taksa.

Kurse qytetarët në lidhje me këtë lirim janë shprehur të kënaqur, ndërsa sa i përket shërbimeve komunale, thonë se para sporteleve nuk ka pritje të gjata dhe shërbimet kryhen mjaftë shpejtë. /Telegrafi/