Që nga gushti mbi 124 mijë qytetarë u dënuan për shkak të mosrespektimit të masave antiCOVID-19

Kosova është duke vazhduar të ballafaqohet me pandeminë COVID-19, ku gjatë ditëve të fundit numri i personave të infektuar me këtë virus ka shënuar rritje.

Përkundër thirrjeve të shumta të ekspertëve shëndetësor, që qytetarët të respektojnë masat mbrojtëse ndaj virusit, një pjesë e qytetarëve po vazhdojnë të shkelin masat antiCOVID.

E për mosrespektimin e këtyre masave, Policia e Kosovës është duke gjobitur qytetarët, ku që nga gushti, kur ka hyrë në fuqi Ligji për Pandeminë e deri tani ka dënuar 124 mijë e 152 qytetarë.

“Lidhur me interesimin tuaj, ju njoftojmë se policia nga fillimi i zbatimit të Ligjit antiCOVID, duke u bazuar në këtë ligj ka shqiptuar 124,152 tiketa”, thuhet në përgjigjen e Policisë së Kosovës, drejtuar Telegrafit.

Ndryshe, sipas Ligjit për COVID-19, qytetarët që nuk bartin maskë, dënohen me 35 euro, kurse për mos respektimin e orarit të lëvizjes, qytetarët dënohen me 200 euro.

“Personi juridik i cili nuk e respekton vendimin e Organit kompetent për kufizimin e qarkullimit të qytetarëve dhe automjeteve në kohën e caktuar, dënohen me gjobë prej 500 euro. Drejtuesi i mjetit motorik i cili nuk e respekton vendimin e Organit Kompetent për kufizimin e qarkullimit të qytetarëve dhe automjeteve sipas orarit të përcaktuar, dënohet me gjobë prej 200 euro. Personi fizik i cili nuk e respekton Vendimin e Organit Kompetent për kufizimin e qarkullimit të qytetarëve dhe automjeteve sipas orarit të caktuar, dënohet me gjobë prej 200 euro”, thuhet në Ligjin për COVID-19.

Kurse, personi juridik i cili nuk e zbaton vendimin e Organit Kompetent për krijimin e kushteve dhe mbajtjen e distancës së përcaktuar në hapësirat në të cilat janë përgjegjës dënohen me gjobë prej 500 euro, ndërsa personi përgjegjës i personit juridik dënohet me gjobë prej 200 euro.

“Personi fizik i cili nuk respekton vendimin e organit kompetent për mbajtjen e maskës, dënohet me gjobë prej 35 euro. Personi fizik i cili nuk respekton vendimin e Organit Kompetent për mbajtjen e distancës fizike, dënohet me gjobë prej 35 euro”.

Ndërkaq, dënimet për ata që organizojnë aktivitete publike dhe jopublike janë më të larta.

“Personi juridik që organizon aktivitete të ndaluara me vendim të Organit Kompetent dënohen me gjobë prej 2000 euro dhe ndalimin e aktivitetit, ndërkaq personi përgjegjës i personit juridik dënohet me gjobë me 2000 euro. Personi fizik i cili organizon aktivitete publike dhe jopublike të ndaluara me vendim të organit kompetent, dënohet me gjobë prej 200 euro dhe ndalimin e aktivitetit”.

Ndryshe, Qeveria e Kosovës, më 15 janar ka marrë vendim për lehtësimin e masave antiCOVID. Me vendimin e ri të Qeverisë së Kosovës, komunat që janë në zonën e verdhë dhe të gjelbër nuk kanë orë policore, kurse sektori i gastronomisë dhe operatorët ekonomik lejohen të punojnë deri në ora 22:00. Ndërkaq, komunat që janë në zonë të kuqe, qytetarëve u ndalohet lëvizja pas orës 21:00, kurse sektori i gastronomisë dhe operatorët ekonomik lejohen të punojnë deri në ora 21:30.

Bazuar në numrin e rasteve brenda një jave në 100.000 banorë, ky është kategorizimi i komunave sipas zonave.

Në zonën e kuqe janë 7 komuna: Prishtina, Fushë Kosova, Podujeva, Mitrovica e Veriut, Mitrovica e Jugut, Zveçani dhe Gjilani.

Në zonën e verdhë janë 14 komuna: Suhareka, Lipjani, Obiliqi, Malisheva, Juniku, Vushtrria, Klina, Shtimja, Prizreni, Peja, Gjakova, Graçanica, Kamenica, Ferizaji.

Në zonën e gjelbër janë 17 komuna: Deçani, Vitia, Rahoveci, Dragashi, Drenasi, Istogu, Skenderaji, Leposaviqi, Kaçaniku, Kllokoti, Zubin Potoku, Mamusha, Novobërda, Hani i Elezit, Parteshi, Ranillugu dhe Shtërpca. /Telegrafi/