“Psalm”, pasioni që kthen në ar simbolet etnografike (Foto/Video)

Simbolet e etnografisë shqiptare të ndërthurura me teknikën e qëndismës, vijnë në një tablo arti në ekspozitën ”Psalm”. Kjo ekspozitë është një vepër arti e mirëfilltë pasi publiku sheh nga afër në galerinë e Fakultetit të Arteve të Bukura, madhështinë e simboleve shqiptare të punuar me fije ari dhe argjendi.

Këto punime janë punuar me mjeshtëri nga artistja Egla Memaj, e cila e ka realizuar këtë projekt pas një pune për më shumë se tre vitesh. Projekti personal i artistes është kuruar nga Najada Hamza.

Në këtë ekspozitë ajo që të binte në sy ishin detaje etnografike nga veshjet popullore të Elbasanit dhe Beratit. Konkretisht, Xhybja e Elbasanit, Brezi i Beratit, Jeleku i Beratit dhe Sako e Beratit të cilat ishin punuar me fije ari dhe argjendi e që të krijonin idenë e një pamje sa sureale aq dhe të veçantë.

Memaj u shpreh se dashuria për etnografinë ka nisur me muzeun e Beratit që në kohën e fakultetit ku ne bënim praktikat mësimore. Në këtë moment vendosa të merrem me etnografinë. Në këtë ekspozitë ”Psalm”që do të thotë këngë hyjnore kam sjell diçka bashkëkohore”.

https://youtu.be/wgti8qBNvAA

”Në këtë ekspozitë prezantohen 29 punime të gjitha të qëndisura, të cilat janë detaje të shkëputura nga veshjet e Beratit si sako, jelek ,breza të cilat përmbajnë motive që janë simbole të vendit tonë nga lashtësia deri më sot”, u shpreh Egla Memaj.

Artistja shtoi se, ”për të bërë këto punime duhet një proces i gjatë 8 deri në 12 orë në ditë”. /ATSH/