Pretendimet e brigadës ukrainase: Rusët vranë të burgosurit ukrainas të plagosur në Avdiivka

Ushtarët e plagosur ukrainas që ishin të rrethuar në pozicionin e mbrojtjes Zenit, u qëlluan nga rusët pavarësisht premtimit për evakuimin e tyre, njoftoi Brigada e 110-të e mekanizuar e Marko Bezruchka, e cila po mbronte Avdiivkan.

“Në lidhje me pozicionin Zenit. Anëtarët e Brigadës 110 u larguan nga Avdiivka nën bombardimet e vazhdueshme të aeroplanëve armik dhe granatimet e artilerisë, sulmet e vazhdueshme me dron, sulmet e automjeteve të evakuimit dhe granatimet e rrugës së evakuimit. Disa ushtarë të plagosur rëndë dhe të vdekur nuk mund të evakuoheshin. Armiku projektoi një ofensivë të shpejtë, në shkallë të gjerë, duke mos lënë hapësirë ​​për përpjekje të shumta”, thuhet në deklaratë.

Ata deklarojnë se për shkak të rrethimit të plotë të bastionit të Zenit, u vendos që të kontaktohej qendra koordinuese dhe organizatat që zhvillojnë negociatat për shkëmbimin e të burgosurve me armikun për të siguruar ndihmë për ushtarët tanë të paarmatosur, të plagosur rëndë, në përputhje me zakonet ndërkombëtare të luftës dhe ligjet që mbrojnë robërit e luftës, transmeton Telegrafi.

Lexo po ashtu "Ishin të gjitha shenjat se...": Ukraina po përgatitej për një luftë të plotë me Rusinë, pesë muaj para se të fillonte

“Armiku i njoftoi koordinatorët e procesit se ata ranë dakord të evakuoheshin dhe të ndihmonin të plagosurit tanë, dhe më pas t’i shkëmbenin. Ushtarët tanë u udhëzuan të shpëtonin jetën e tyre. Se çfarë ndodhi më vonë e morëm vesh nga mediat e armikut. Familjarët identifikuan Heorhii Pavlov. Andrii Dubnytskyi dhe Ivan Zhytnyk si të vrarë në një video nga pozicioni i pushtuar i Zenit të publikuar nga armiku. Sipas informacioneve tona, armiku qëlloi dhe vrau gjithashtu Oleksandr Zinchuk dhe Mykola Savosik. Identiteti i luftëtarit të gjashtë ende nuk është konfirmuar; me shumë mundësi ka qenë pjesëtar i njësisë së bashkangjitur”, kanë thënë nga brigada.

Të premten, më 16 shkurt, forcat ukrainase u tërhoqën nga Zenit, një pozicion kyç mbrojtës në jug të Avdiivka, për të shpëtuar jetë dhe për të përmirësuar situatën operacionale.

Të dielën, më 18 shkurt, të afërmit e disa ushtarëve ukrainas të plagosur rëndë, të cilët u kapën pasi forcat ruse pushtuan pozicionin e Zenit në Avdiivka, njohën trupat e të dashurve të tyre në një video që qarkullonte në mediat sociale ruse. /Telegrafi/