Kurti përmend referendumin për bashkim me Shqipërinë

Kryetari i Lëvizjes Vetëvendosje dhe kandidati për Kryeministër në zgjedhjet parlamentare të 14 shkurtit, Albin Kurti, ka folur rreth mundësisë së referendumit për bashkim me Shqipërinë.

Në një bashkëbisedim online me kryeredaktorin Brian Wong të “Oxford Political Review” dhe redaktorin Nicholas Leah, ka thënë se duhet të jetë një referendum sa i përket bashkimit me Shqipërinë.

“Kushtetuta e Kosovës thotë që Kosova nuk mund të bashkohet me ndonjë shtet tjetër. Serbët, boshnjakët e të tjerë janë qytetarë të Kosovës, por kur Serbia dëshiron të ndëkrhyjë në punët e brendshme të Kosovës, atëherë Kosova është shtet i dobët për t’u konfrontuar me hegjemoninë e Serbisë. Serbia dëshiron që të krijojë Serbinë e Madhe pasi që Beogradi u bën presion serbëve nëpër shtete të Ballkanit të mos integrohen. Ne duam të kemi të drejtën e referendumit, ne nuk duam të shohim ndonjë formë të dhunës për tu bashkuar. Kosova duhet ta ketë të drejtën për referendum jo domosdo që të bashkohemi me Shqipërinë por të kemi të drejtën e referendumit. Nëse bëhet në formë paqësore dhe demokratike atëherë po bashkim me Shqipërinë dhe do ta respektojmë rezultatin por në asnjë mënyrë ne nuk do të nisim një luftë të tretë ballkanike në mënyrë që bashkohemi me Shqipërinë”, tha Kurti.

Kjo deklaratë e Kurtit erdhi pak ditë pasi kryetari i AAK-së dhe kandidati për President, Ramush Haradinaj, e ka përmendur pikërisht referendumin si opsion nëse deri në vitin 2025 nuk ka epilog për çështjen e Kosovës dhe vendi mbetet në status-quo.

“Mos keni frikë, z. Vuçiq. Nuk keni nevojë të jeni nervoz. Kosova vetëm po e kërkon atë që i takon. Nëse ju dhe të tjerët dëshironi ta shmangni një referendum mbi bashkimin e Kosovës me Shqipërinë në vitin 2025, ka një mënyrë shumë të thjeshtë: Serbia ta njohë Kosovën si shtet të pavarur. Tutje, Kosova e di rrugën e saj drejt anëtarësimit në NATO, BE dhe OKB. Me retorikë histerike nuk do të na ndaloni në të drejten tonë për të definuar të ardhmen e Kosovës”, kishte thënë Haradinaj. /Telegrafi/

Deklaratën e Kurtit që ka të bëjë me referndumin për bashkim me Shqipërinë mund ta ndiqni nga minuta 40 në videon e mëposhtme: